काठमाडौं (हाम्रो खेलकुद)– कतार एअरवेज सहिद स्मारक ए डिभिजन लिगको अघिल्लो संस्करणको अन्तिम खेलमा मछिन्द्र क्लब र त्रिभुवन आर्मी फुटबल क्लबबीच प्रतिस्पर्धा भएको थियो । २०७६ फागुन ३ गतेको अन्तिम खेलबाट लिग उपाधिको छिनोफानो हुने अवस्थामा थियो ।

आर्मीले बराबरी गर्दा च्याम्पियन बन्ने अवस्था थियो भने मछिन्द्रलाई जित्नै पर्ने अवस्था थियो । तुलानात्मक रुपमा मछिन्द्रलाई भन्दा नतिजाले पुग्ने आर्मी फेरि एक पटक चुक्दा दोस्रो पटक च्याम्पियन हुने अवसरबाट बञ्चित भएको थियो । विकास तामाङको आत्मघाती गोलमा १–० ले विजयी हुँदै मछिन्द्र पहिलो पटक लिग च्याम्पियन बनेको थियो ।

आर्मीको लिगमा समान कथा २०६३ सालमा पनि भएको थियो । नेपाल पुलिस क्लबसँग बराबरी गर्दा पुग्ने अन्तिम खेल गुमाउँदा आर्मीले उपविजेतामा चित्त बुझाउनु परेको थियो । त्यति बेला पुलिस पहिलो पटक लिग च्याम्पियन बनेको थियो । आर्मी भने अहिले सम्म च्याम्पियन बन्न सकेकेको छैन ।

दुई पटक उपाधि नजिक पुगेर पनि चुकेको आर्मीले यसपटक भने साविक विजेता मछिन्द्रको दोस्रो खेलमा नै सामना गर्दै छ । दशरथ रंगशालामा सोमबार दिउँसो ४ः४५ बजे अघिल्लो संस्करणको अन्तिम खेलको झल्को दिने गरि मछिन्द्र र आर्मीबीच प्रतिस्पर्धा हुनेछ । यद्दपी त्यति बेला जत्तिको दबाबमा भने यसपटक टोली हुने छैनन् । त्यो उपाधिको छिनोफानो हुने खेल थियो भने यसपटक उपाधि जित्न आधार तयार पार्ने खेलमा एक अर्काको सामना गर्नुपर्नेछ ।

आर्मीले बराबरीबाट यसपटकको लिगको सुरुवात गर्दै भने मछिन्द्रले जितबाट यात्रा थालेको छ । आर्मी अर्को विभागिय टोली पुलिससँग १–१ को बराबरी खेलेको थियो । मछिन्द्रले भने एनआरटीलाई २–१ ले हराएको थियो । तुलात्मक रुपमा मछिन्द्र अन्य १३ टोलीमा भन्दा स्टार खेलाडीहरु बढी रहेका छन् ।

दोस्रो चरणका खेलमा थ्री स्टार क्लबलाई सातदोबाटो युथ क्लबले १–० ले स्तब्ध पारेको थियो । अन्य खेलमा संकटा क्लबलाई फ्रेन्ड्स २–१, च्यासलले एपिएफ, मनाङ मस्र्याङ्दीले हिमालयन शेर्पालाई र नेपाल पुलिस क्लबले जावलाखेल युथ क्लबलाई समान १–० ले हराएको थियो ।