काठमाडौं (हाम्रो खेलकुद)– लिगको सर्वाधिक सफल टोली मनाङ मस्र्याङ्दी क्लबले लिगका आफ्ना ५ खेल पोखरामा खेलाउने योजनाका साथ क्लबहरुलाई प्रस्ताव गरेको छ ।

मनाङको तर्फबाट क्लबहरुलाई प्रस्ताव गर्ने जिम्मेवारी पाएका सदस्य विजय घलले भोली सम्म पोखरा खेल्न तयार हुने टोलीको टुंगो लाग्ने बताएका छन् । ‘हामीले ५ वटा खेल पोखरामा खेलाउने गरि क्लबहरुलाई प्रस्ताव गरेका छौं, एन्फा सदस्य समेत रहेका उनले भने,‘ केहिबाट सकारात्मक जवाफ पाएका छौं । क्लबहरु राजी भएको खण्डमा मात्र पोखरामा खेल हुन्छ ।’

लिग कमिटीका निर्देशक मिश्र मनाङ र खेल परेका अन्य क्लब दुवै पक्ष राजी भएर लिखित सहमति खण्डमा मात्र पोखरामा लिगका खेल खेलाउन सकिने बताउँछन् । यो दुई पक्षको समझदारीका आधारमा मात्र तय हुन्छ, उनले भने,‘ एन्फाले क्लबहरुलाई खेल्न जानका लागि बाध्य पार्न सक्दैन ।’

पोखरामा लाग्ने सबै खर्च भने मनाङले नै बेहोर्नुपर्ने हुन्छ । खेलका लागि आवश्यक म्याच अफिसियल, अर्को क्लबका खेलाडी, प्रशिक्षकसहितको टोली मनाङले नै बेहोर्नुपर्ने हुन्छ, मिश्रले भने,‘त्यहाँ टिकट विक्रीबाट संकलन हुने रकम पनि मनाङकै हुनेछ । भविष्यमा होम एण्ड अवेका आधारमा लिग सञ्चालन गर्ने उद्देश्य भएकाले यदि यसपटक पोखरामा केहि हुन सकेको खण्डमा त्यो नयाँ अभ्यास हुने मिश्र बताउँछन् ।

कतार एअरवेज सहिद स्मारक ए डिभिजन लिगको नौं चरण सम्मको खेल तालिका सोमबार सार्वजनिक हुने भएको छ । दशरथ रंगशालासहित ४ वटा मैदानमा खेलाउने योजनाका साथ लिग सुरु गरेको एन्फाले केहि प्राविधिक कठिनाईका कारण खेल तालिका सार्वजनिक नगरेको लिग कमिटीका निर्देशक सञ्जिव मिश्रले जानकारी दिए ।

‘९ राउन्ड सम्म कुन कुन क्लबीच प्रतिस्पर्धा हुन्छ भन्ने यसअघि नै तय भइसकेको छ । सबै क्लबलाई त्यस बारेमा जानकारी दिइसकेका छौं, उनले भने,‘खाली मिती र मैदानका कारण हामीले सार्वजनिक नगरेका हौं । मैदान पछि तय गर्ने गरि भएपनि सोमबार सम्म ९ राउन्ड सम्मको खेल तालिका सार्वजनिक गर्ने गरि तयारी गरिरहेका छौं ।

दशरथ रंगशाला, एन्फा कम्प्लेक्सको क्रितिम मैदान, च्यासल मैदानसहित एन्फाले मनाङको प्रस्तावमा केहि खेल पोखरा रंगशालामा खेलाउने योजना सार्वजनिक गरेको थियो । च्यासल मैदानको हकमा अहिले सम्म पनि राष्ट्रिय खेलकुद परिषद् (राखेप) लाई नै हस्तान्तरण नभएकोले तत्काल खेलाउने सम्भावना कम रहेको मिश्रले बताए ।

दशरथ रंगशालामा अघिल्लो लिगको दाँजोमा दर्शकको उपस्थिति उल्लेख भएकोले बढी खेल त्यहि मैदानमा खेलाउने विषयमा पनि एन्फाले छलफल अघि बढाइरहेको मिश्रले बताए । यद्दपी केहि खेल भने एन्फा मैदानमा गर्नैपर्ने उनको तर्क छ । ‘नौं चरण भित्र मनाङले खेल्नुपर्ने क्लबहरु खेल्न तयार भएको लिखित सहमति पत्र प्राप्त भएको अवस्थामा मात्र पोखरामा केहि खेल हुनेछन्,’ मिश्रले भने ।

अखिल नेपाल फुटबल संघ (एन्फा) ले पहिलो चरणको खेल तालिका सार्वजनिक गर्दै मंसिर ३ गते लिग सुरु गरेको थियो । दोस्रो चरणका ३ खेल बाँकी छ । जसअनुसार आइतबार जावलाखेल युथ क्लब र नेपाल पुलिस क्लबबीच प्रतिस्पर्धा हुँदैछ । त्यस्तै ब्रिगेड ब्वाइज क्लब र न्यूरोड टिम एनआरटी तथा त्रिभुवन आर्मी फुटबल क्लब र साविक विजेता मछिन्द्र क्लबबीच सोमबार प्रतिस्पर्धा भएसँगै दोस्रो चरणको खेल सकिनेछ । एन्फाले पहिलो पटक विकेन्ड लिगको अवधारण अनुसार शुक्रबारदेखि सोमबार सम्म खेल गराउँदै आएको छ ।