काठमाडौं (हाम्रो खेलकुद) – यसै सिजन एएफसीको क्लब लाइसेन्स प्राप्त गरेको नेपाल एपिएफ क्लबका प्रशिक्षक कुमार थापाले विदेशी खेलाडी ल्याउन अब ढिला गर्नु नहुने बताएका छन् ।

कतार एअरवेज सहिद स्मारक ए डिभिजन लिगमा लगातार दोस्रो हार बेहोरेपछि थापाले भने, ‘आफ्नै स्तरका टोलीसँग लगातार दोस्रो खेलमा गुमाएपछि हामीलाई गाह्रो भएको छ । अब विदेशी खेलाडी ल्याउने विषयमा व्यवस्थापनसँग कुरा गर्छु ।’

लिगमा सहभागी १४ मध्ये तीन विभागिय टोली एपिएफ, त्रिभुवन आर्मी क्लब र नेपाल पुलिस क्लबमा विदेशी खेलाडी छैनन् । आर्मी र एपिएफले क्लब लाइसेन्स लिइसकेकाले अब विदेशी खेलाडी लिनका लागि पनि बाटो खुलिसकेको छ ।

‘विभागीय खेलाडीले मात्रै पनि धान्न त गाह्रो छ । क्लब लाइसेन्स पाएपछि अरु विभागीय टिमले पनि विदेशी खेलाडी नल्याएपछि हामीले पनि त्यसलाई फलो गरे जस्तो लाग्छ । तर त्यसलाई अब ओपन हुनर्पछ । व्यवस्थापकको तर्फबाट पनि त्यसलाई प्राथमिकतामा राख्नपर्छ’, थापाले भने, विभागीय बाहेक सबैटिममा विदेशी खेलाडी छन्। त्यसले गर्दा लेभल फरक छ । त्यसले गर्दा हामीलाई गाह्रो छ । एउटा टोलीमा ४ जना विदेशी खेलाडी हुनु भनेको धेरै हो ।’

पहिलो खेलमा ब्रिगेड ब्वाइज क्लब (बिबिसी) ३–२ को हार बेहोरेको एपिएफले शनिबार च्यासल युथ क्लबसँगको खेल १–० ले गुमाएको थियो । ‘अघिल्लो खेलमा भन्दा राम्रो प्रर्दशन गरेका हौं । तर नतिजाको हिसाबले राम्रो भएन । ६ अंक गुमाउनु भनेको नराम्रो हो। अबको दिनमा एकदम गाह्रो छ,’उनले थपे,’मिडफिल्डमा सेटअप हुन गाह्रो छ । क्लब लाइसेन्स भएपछि विदेशी खेलाडी राख्ने राम्रो मौका छ। त्यसबारेमा सोच्दै छौँ। राम्रो विदेशी खेलाडी पायौं भने राख्नेछौं । टिम व्यवस्थापकसँग कुरा भैरहेको छ। त्यो पनि सम्भावना छ। अहिले विदेशी खेलाडी ल्याएन भने गाह्रो छ ।’

व्यक्तिगत रुपमा आफू माथि दबाब नभएपछि लगातार टोलीले नतिजा निकाल्न नसक्दा स्वभाविक दबाब भने रहने थापाले बताए । ‘६ अंक गुमाउनु भनेको १२ अंक गुमाए जस्तो भएको छ। हामी समानजस्तै टिमलाई हराएनौं भने पछि झन् गाह्रो हुन्छ’, उनले जोडे, ‘आशा गरौँ अर्को खेलमा अझ राम्रो गर्नेछौं ।’

च्यासलका प्रशिक्षक बालगोपाल साहुखल अघिल्लो खेलको दाँजोमा प्रदर्शनमा सुधार भएको र नतिजा निकाल्न सफल हुँदा अन्त्यन्तै खुसी लागेको बताए । ‘जित्ने गरेर खेलेका थियौँ। त्यसमा सफल भयौं । पहिलो चरणको नतिजा राम्रो थिएन’, उनले भने, ‘आज अंक जोड्न सफल भयौ युवा टिम थियो । खेलाडीले बललाई च्यालेन्ज गरेर खेलेका छन् । बलमा सहज भएपनि हाम्रो डिफेन्सलाई तोड्न सक्दैन भन्नेमा ढुक्क थियौं । सेटमा धेरै ध्यान दिएका थियौं ।’