काठमाडौं (हाम्रो खेलकुद) – एक गोलले पछि परेको स्थिति उल्ट्याउँदै संकटा क्लबले सहिद स्मारक ‘ए’ डिभिजन लिगमा ललितपुरको फ्रेन्ड्स क्लबमाथि पूनरागमन जित निकालेको छ । फ्रेन्ड्सले सुरुवाती अग्रता जोगाउन नसक्दा संकटासँग २–१ को हार बेहोरेको हो ।

त्रिपुरेश्वरस्थित दशरथ रंगशालामा शुक्रबार भएको खेलमा संकटाको जितमा निरज बस्नेत र फोडे फोफानाले गोल गर्दा फ्रेन्ड्सका कप्तान प्रकाश बुढाथोकीले एक गोल गरे । खेलको १३औं मिनेटमा फोफानाको प्रहार पोस्ट नजिकैबाट बाहिरिदा संकटा अग्रता लिनबाट चुक्यो ।

१८औं मिनेटमा कर्नरबाट आएको बलमा फोफानाको प्रहार विपक्षी डिफेन्डरलाई लाग्दै पुन कर्नर हुदा सुभास गुरुङकै कर्नरमा फोफानाकै प्रहार डिफेन्डर डिफ्लेक्ट हुदा गोलरक्षक राहुल रामचन्द्र यादवले अघि बढ्दै बचाए । ३०औं मिनेटमा सुभासले पेनाल्टी बक्समा सुवर्ण अवसर पाएपनि उनको प्रहार आकासियो ।

४१औं मिनेटमा कप्तान प्रकाशले दोस्रो बार च्याप्दै गरेको प्रहार पोस्ट नजिकैबाट बाहिरियो । ४२औं मिनेटमा प्रकाशले गोल गर्दै फ्रेन्ड्सलाई १–० को अग्रता दिलाए । निसेन सुब्बाको पासमा प्रकाशले पेनाल्टी बक्सबाहिरबाट गरेको सशक्त प्रहार दोस्रो बारको टप कर्नरमा लाग्दै गोलमा परिणत भएको थियो । पहिलो हाफमा संकटाको केही प्रहारमा गोलरक्षक राहुल बाधक बन्दा संकटाले गोल गर्न सकेन ।

५७औं मिनेटमा निरज बस्नेतले गोल गर्दै खेललाई १–१ गोलको बराबरीमा ल्याए । सुभासको कर्नरमा कसैको निगरानीमा नरहेका निरजले हेडरमार्फत बललाई जाली चुमाएका थिए । ७०औं मिनेटमा फोफानाको पेनाल्टी बक्सभित्रको प्रहारलाई गोलरक्षक राहुलले पञ्च गर्दै बचाए । लगत्तै ७२औं मिनेटमा प्रकाशको प्रहारलाई संकटाका गोलरक्षक राजावाबु थापाले पञ्च गर्दै बचाए । ८७औं मिनेटमा फोफानाले गोल गर्दै संकटालाई २–१ को पूनरागमन जित दिलाए ।

जितपछि संकटाको दुई खेलबाट ४ अंक पुगेको छ । पराजित फ्रेन्ड्सको दुई खेलबाट १ अंक छ । यसअघि फ्रेन्ड्सले सातदोबाटोसँग गोलरहित तथा संकटाले हिमालयन शेर्पासँग १–१ गोलको बराबरी खेलेको थियो ।

दिनको पहिलो खेलमा सातदोबाटो युथ क्लबले रुस्लान थ्री स्टार क्लबलाई १–० ले स्तब्ध पारेको छ । लिगमा शनिबार दुई खेलमा प्रतिस्पर्धा हुनेछ । पहिलो खेलमा च्यासल युथ क्लब र नेपाल एपीएफ फुटबल क्लब तथा दोस्रो खेलमा हिमालयन शेर्पा र मनाङ–मर्स्र्याङ्दी क्लबबीच प्रतिस्पर्धा हुनेछ । खेल त्रिपुरेश्वरस्थित दशरथ रंगशालामा दिउँसो १ र ४ः४५ बजे हुनेछ ।