एजेन्सी – चार देशीय महिला फुटबलको सिरिजमा ब्राजिलको महिला फुटबल टोलीले भारतको महिला फुटबल टोलीमाथि फराकिलो जित निकालेको छ ।

एरिना द अमेजोनियामा ब्राजिलमा शुक्रबार भएको खेलमा घरेलु टोली ब्राजिलले भारतमाथि ६–१ को फराकिलो जित निकालेको हो । ब्राजिलको फराकिलो जितमा बोर्गेस अरियाडिनाले दुई तथा डेविन्हा, जियोभाना, बोर्गेस अरियाडिना, क्यारोलिन र जिसेले समान एक गोल गरिन् । भारतकी मनिषा कल्यानले एक गोल फर्काइन् ।

ब्राजिलले खेलको पहिलो मिनेटमै कप्तान डेबिन्हाको गोलबाट अग्रता लिएको थियो । आठौं मिनेटमा मनिषा कल्यानले गोल गर्दै खेललाई १–१ गोलको बराबरीमा ल्याइन् । ३६औं मिनटमा जियोभानाले गोल गर्दै ब्राजिललाई पहिलो हाफमा २–१ को अग्रता दिलाइन् ।

दोस्रो हाफमा झनै आक्रामब बनेको ब्राजिलले भारतलाई लगातार दवावमा राख्दै चार गोल थप्न सफल भएको थियो । ५२औं मिनटमा बोर्गेस अरियाडिनाले गोल गर्दै ब्राजिललाई ३–१ ले अघि बढाइन् । ५५औं मिनेटमा क्यारोलिनले गोल गर्दै ब्राजिललाई फराकिलो जिततर्फ अग्रसर गराइन् ।

७६औं मिनटमा जिसेले गोल थपेपछि ब्राजिलले खेलमा ५–१ को आरामदायी अग्रता लिन सफल भयो । ८१औं मिनटमा बोर्गेसले व्यक्तिगत दोस्रो तथा टोलीका लागि छैटौं गोल गर्दै ब्राजिलको सानदार जित पक्का गरिन् ।

अब भारतले आफ्नो दोस्रो खेल आइतबार चिलीसँग खेल्नेछ । ब्राजिलले सोही दिन भेनेजुएलासँग खेल्ने तालिका छ । भारतले एएफसी वुमन्स एसिया कप २०२२ को तयारीका लागि यो चार देशीय सिरिजमा सहभागिता जनाएको हो । शुक्रबार नै भएको खेलमा चिलीले भेनेजुएलालाई १–० ले हराउँदै विजयी शुरुवात गरेको छ ।