एजेन्सी – युइएफए च्याम्पियन्स लिगको समूह चरणमा आज (बुधबार) राति पाँचौ राउन्डको विभिन्न ८ खेलमा प्रतिस्पर्धा हुदैछ । साविकको उपविजेता इंग्लिस क्लब म्यानचेस्टर सिटीले घरेलु मैदानमा फ्रान्सेली क्लब पेरिस सेन्ट जर्मेन (पीएसजी) को आतिथ्यता गर्दैछ ।

खेल इतिहाद स्टेडियममा नेपाली समयअनुसार राति १ः४५ बजे हुनेछ । दुवै टोली जित निकाल्दै च्याम्पियन्स लिगको नकआउट चरणमा स्थान पक्का गर्न चाहन्छ । चार खेल खेलेको सिटी ९ अंक जोडेर शीर्षस्थानमा रहेको छ । समान खेलबाटै पीएसजी ८ अंक जोडेर दोस्रो स्थानमा छ ।

सिटीको मैदानमा हुने यस खेलमा घरेलु टोली चौथो जित निकाल्दै च्याम्पियन्स लिगमा छनोट हुन चाहन्छ । टोलीसँग रहिम स्टर्लिङ, फिल फोडेन, रियाद महारेज, इल्केए गुन्डोगान, रोड्री, बर्नाडो सिल्भा, जोओ क्यान्सेलो, एमेरिक लापोर्टा, रुवेन डियास, केल वाल्कर र गोलरक्षक इडर्सन मोराएस रहेका छ्न् । कोभिडका कारण मिडफिल्डर केभिन डि ब्रुयन तथा चोटका कारण ज्याक ग्रेलिस र फेरान टोरेस टोलीमा हुने छैनन् ।

यता, पीएसजी पनि घरेलु टोलीलाई पराजित गर्दै च्याम्पियन्स लिगमा स्थान पक्का गर्न चाहन्छ । टोलीसँग केलियन एमबाप्पे, लियोनेल मेस्सी, मार्काे भेराट्टी, ड्यानियल पारेडेस, इड्रिसा गाना गुआई, मार्किन्हस, प्रेसनेल केमपेम्वे र अचरफ हाकिमी रहेका छन् । यसै समरमा स्पेनिस क्लब रियल म्याड्रिडबाट आबद्ध भएका सर्जियो रामोसले पीएसजीबाट डेब्यु गर्ने सम्भावना रहँदा चोटका कारण नेयमारले खेल्ने सम्भावना न्युन छ ।

यि दुई टोलीको पछिल्लो ५ खेलको नतिजामा सिटी ३ खेलमा विजयी भएको छ । एक खेल पीएसजीले आफ्नो पक्षमा पार्दा एक खेल बराबरीमा सकिएको छ । पछिल्लो खेलमा पीएसजीले सिटीलाई २–० ले पराजित गरेको थियो । जसमा मेस्सीले पनि गोल गरेका थिए ।

यही समूहको अर्काे खेलमा क्लब ब्रुग र आरबी लाइप्जिगबीच राति १ः४५ बजे नै प्रतिस्पर्धा हुनेछ । क्लब ब्रुगलाई च्याम्पियन्स लिगको नकआउट चरण पुग्ने सम्भावना जीवित राख्न जितको खाँचो छ । लाइप्जिगको नकआउट चरण पुग्ने सम्भावना सकिएको छ ।