काठमाडौं (हाम्रो खेलकुद) – कोरोना महामारीका अघिल्लो वर्ष स्थगित भएको सहिद स्मारक ए डिभिजन लिग गत साता सुरु भएको छ । यसपटक पनि होला नहोला भन्ने शंका थियो । त्यसका वावजुद अखिल नेपाल फुटबल संघ (एन्फा) त्रिपुरेश्वरस्थित दशरथ रंगशालामा लिग सुरु गर्न सफल भएको छ ।

वैशाख/जेठमा नेपाल सुपर लिगको सफल आयोजनाले एन्फालाई पनि फ्लड लाइटमा लिग गराउने निर्णयमा पुग्न मद्दत गरेको हुनुपर्छ । यद्दपी कोरोना महामारीकै बीचमा भएको एनएसएलमा दर्शकलाई दशरथ रंगशालामा प्रवेश दिएको थिएन । अघिल्लो संस्करणमा दर्शकको कम रुचीले लिग खल्लो बनाएको थियो ।

दर्शक तान्नका लागि विभिन्न अफर राख्दा पनि दर्शकमा खास रुची देखिएको थिएन । अघिल्लो संस्करणमा भन्दा यसपटक दर्शक बढेका छन् । लिग अघि बढ्दै जाँदा अझै बढी दर्शकलाई तान्न सक्ने संकेत देखिएको छ । लिग जति अघि बढ्दै जान्छ त्यसले रोमाञ्चकतालाई पनि बढाउँने छ नै ।
सहभागी १४ टोलीले लिगमा १३ खेल खेल्नेछन् । लिगमा जम्मा ९१ खेल हुनेछन् । त्यसमध्ये पहिलो चरणका ७ खेल सकिएका छन् । विगतमा छिटो लिग सकाउने परम्परा बसाएको एन्फाले यसपटक केहि फरक अभ्यास गर्दै एक चरणको खेल समाप्ती पछि केहि दिनको विश्राम दिएको छ ।

रिकभरी समय कम पाएको भन्दै विगतमा क्लबहरुले आलोचना गर्थे । सम्भवत यसपटक त्यस्तो गुनासो सुन्नुपर्ने छैन । तथापी एन्फाले सुरुवातमा सुरुवातमा गरेको घोषणालाई पटक पटक बदल्ने गरेको अनुभव पनि छ । त्यसैले जसरी सुरुवात लिगको भएको त्यसैगरी अन्त्य होला नहोला त्यसका लागि केहि समय कुर्नैपर्छ ।

पहिलो चरणको समाप्तीमा अप्रत्यासित नतिजा देखिएन । लिगमा आउने अप्रत्यासित नतिजाले पनि त्यसको रौनकता बढाएको हुन्छ । ठूला भनिएका टोली तुलानात्मक रुपमा कमजोर मानिएका टोलीले रोकेको वा हराएका थुप्रै उदाहरण घरेलु लिगमा पनि छन् । पहिलो चरणका ७ खेल सकिदा ४ टोलीले जित निकालेका छन् ।

दाबेदारका रुपमा हेरिएका लिगको तीन पटकको विजेता थ्री स्टार, कीर्तिमानी आठ पटकको विजेता मनाङ मस्र्याङ्दी क्लब, साविक विजेता मछिन्द्र क्लबसँगै ब्रिगेड ब्वाइज क्लब (बिबिसी) ले लिगमा विजयी सुरुवात गरेका छन् । पहिलो खेलकै आधारमा टोलीले लिगभर कस्तो प्रदर्शन गर्छ भन्न सकिन्न ।

३ खेल बराबरीमा टुंगिएका छन् । लिगको पहिलो खेलमा फ्रेन्ड्स क्लब र नव प्रवेशी सातोबाटो युथ क्लबले गोलरहित बराबरी खेले भने संकटा क्लब र हिमालयन शेर्पा क्लबले १–१ को बराबरी खेलेका छन् । पहिलो खेलमै आमने सामने भएका दुई विभागिय टोली त्रिभुवन आर्मी फुटबल क्लब र नेपाल पुलिस क्लबले पनि १–१ को बराबरीमा नै सन्तोष मान्नु परेको छ ।

च्यासल युथ क्लब, नेपाल एपिएफ क्लब, जावलाखेल युथ क्लब र न्यूरोड टिम (एनआरटी) ले भने हारबाट लिगको सुरुवात गरेका छन् । शुक्रबार अर्को चरणको सुरुवात हुँदा लिगको रोमाञ्चकताले अर्को मोड पक्कै लिने नै छ । लिग जति अघि बढ्दै गर्छ सम्भावना र अनुमानको चर्चा पनि त्यसरी नै चुलिनेछ । चोटका कारण झण्डै एक वर्षपछि थ्री स्टारका विक्रम लामा र मछिन्द्रका विमल घर्तीमगरले यहि लिगमात्र पूनरागमन गरेका छन् ।

पहिलो चरणको खेलमा १६ गोल भएका छन् । सबै भन्दा फराकिलो अन्तरले थ्री स्टारले च्यासललाई ३–० ले हराएको छ । बिबिसीले एपिएफमाथि ३–२ को, मनाङले जाउलाखेलमाथि १–० को र मछिन्द्रले एनआरटीमाथि २–० को प्रतिस्पर्धात्मक जित निकालेको थियो ।
७ खेल सकिदा १४ खेलाडीले गोल गरेका छन् । त्यसमा मछिन्द्रका सुनिल बल र बिबिसीका दीनेश राईले पहिलो खेलमै समान २ गोल गरेका छन् । अन्य १२ खेलाडीले समान एक गोल गरेका छन् ।

तथ्याङ– लिगको पहिलो चरण

जम्मा खेल– ७

जम्मा गोल-१६

पहिलो हाफमा गोल-५ गोल

दोस्रो हाफमा गोल-११

आत्मघाती गोल – ०

पँहेलो कार्ड- २५

नविन श्रेष्ठ (अफिसियल) पँहेलो कार्ड

रातो कार्ड – १ र

ोनेल एन्थोनी पउल (फ्रेन्ड्स) सातदोबाटोविरुद्ध दोहोरो पँहेलो कार्ड

पेनाल्टीमा गोल – ०

पेनाल्टी मिस – १

विकास मेराग्लिया (थ्री स्टारविरुद्ध)

पहिलो चरणको नजिता

फ्रेन्ड्स ० सातदोबाटो ०

संकटा १ हिमालयन शेर्पा १

थ्री स्टार ३ च्यासल युथ ०

बिबिसी ३ एपिएफ २

मनाङ १ जावलाखेल ०

आर्मी १ पुलिस १

मछिन्द्र २ एनआरटी १

गोल गर्ने खेलाडी

२ गोल – दिनेश राई (बिबिसी), सुनिल बल (मछिन्द्र)

१ गोल –लक्ष्मण रुचाल (संकटा), त्रिदेव गुरुङ (हिमालयन शेर्पा) , निशान खड्का (थ्री स्टार ), रफायएल रिम (थ्री स्टार) , अनन्त तामाङ (थ्री स्टार), सुरज गुरुङ (बिबिसी), आशिष लामा (एपिएफ), विकी तामाङ (एपिएफ) , दीनेश राजवंशी (मनाङ), सन्तोया हेमरुन (पुलिस), विवेक बस्नेत (आर्मी), एरिक विष्ट (एनआरटी)