काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिगमा आज (सोमबार) पहिलो राउन्डको अन्तिम दुई खेलमा प्रतिस्पर्धा हुदाँ गत सिजनको च्याम्पियन मच्छिन्द्र फुटबल क्लबले न्युरोड टिम (एनआरटी) सँग प्रतिस्पर्धा गर्दैछ ।

खेल त्रिपुरेश्वरस्थित दशरथ रंगशालामा दिउँसो ४ः४५ बजेपछि हुनेछ । साविकको विजेता मच्छिन्द्र फुटबल क्लबले न्युरोड टिम (एनआरटी) लाई हराउँदै लिगको उपाधि रक्षा अभियान थाल्नेछ ।

स्टार खेलाडीले भरिएको मच्छिन्द्रसँग बिमल घर्तीमगर, मनिष डाँगी, कप्तान सुजल श्रेष्ठ, रेजिन धिमाल, विशाल राई, सुनिल बल, रेजिन सुब्बा, अभिषेक रिजाल, विशाल श्रेष्ठ, देवेन्द्र तामाङ, विजय धिमाल, छिरिङ गुरुङ, दिलेन लोक्तामको साथ रहेको छ । विदेशी खेलाडीको रुपमा नुर्लान नोब्रुजोभ र एन्ड्रिएस निया रहेका छन् ।

यता, एनआरटी पनि पहिलो खेलमा च्याम्पियन मच्छिन्द्रलाई स्तब्ध पार्दै लिगमा सुखद् सुरुआतको लक्ष्यमा मैदान उत्रनेछ । गत जेठमा सम्मन्न नेपाल सुपर लिगमा उच्च प्रदर्शन गरेका मेसुके ओलोमोउ र स्टेफेन समिरको साथ पाएको एनआरटीसँग अरु प्रतिभावान खेलाडी पनि रहेका छन् । एरिक विष्ट, दर्शन गुरुङ, अजित प्रजापति, राजेश परियार, अशोक थापामगर, शिव गुरुङ, रञ्जन विष्ट, विक्रम धिमाल र दिपेश आलेमगर टोलीमा रहेका छन् ।

अघिल्लो लिगमा मच्छिन्द्रले एनआरटीलाई १–० ले पराजित गरेको थियो । मच्छिन्द्र सोही जितलाई निरन्तरता दिने योजनामा रहँदा एनआरटी उक्त नतिजालाई उल्ट्याउने लक्ष्यमा हुनेछ ।