एजेन्सी – इंग्लिस प्रिमियर लिग अन्तर्गत टोटेनहम हट्सपरले घरेलु मैदानमा लिड्स युनाइटेडमाथि २-१ को संघर्षपूर्ण जित निकालेको छ । पहिलो हाफमा पछि परेको टोटेनहमले दोस्रो हाफमा २ गोल गर्दै जित हासिल गरेको हो ।

लिड्सका लागि ड्यानिएल जेम्सले खेलको ४४ औं मिनेटमा गोल गरेका थिए । ज्याक ह्यारिसनको क्रसलाई पेनाल्टी क्षेत्रभित्र जेम्सले सहजै गोल गर्दा पाहुना टोलीले अग्रता लिएको थियो । पहिलो हाफमा बल पोसेसनमा दबाब राख्दै लिड्सले खेलमा पकड जमाएको थियो । तर दोस्रो हाफमा भने टोटेनहम पुनरागमन गर्न सफल भयो ।

दोस्रो हाफको सुरुवातमै ह्यारी केन खेल बराबरी गर्नबाट चुके । तर ५८ औं मिनेटमा पिएर एमिल होएबिएरले बराबरी गोल फर्काए । लुकास मोउराको पासमा होएबिएरले पेनाल्टी क्षेत्र भित्रबाट गोल गरेका थिए । त्यसको ११ मिनेटपछि नै सर्जियो रेगुइलोनले लन्डन टोलीलाई अग्रता दिलाए । एरिक डाएरको फ्रिकिक पोस्टमा लागेर फर्केपछि रिबाउन्डमा उनले गोल गरेका थिए ।

यस जितसँगै एन्टोनियो कोन्टेले टोटेनहमको जिम्मेवारी लिएपछि प्रिमियर लिगमा पहिलो जित दर्ता गरेका छन् । टोटेनहम १२ खेलमा ६ जित, १ बराबरी र ५ हारसँगै १९ अंक जोड्दै अंक तालिकाको सातौं स्थानमा छ । लिड्स १२ खेलमा २ जित, ५ बराबरी र ५ हारसँगै ११ अंकसहित १७ औं स्थानमा छ । चेल्सी १२ खेलमा २९ अंकसहित शीर्षस्थानमा यथावत छ ।