काठमाडौं (हाम्रो खेलकुद) – खेलाडीका रुपमा मनाङ मर्स्याङ्दी क्लबमा खेलेका राजेन्द्र तामाङ अहिले प्रशिक्षकको रुपमा क्लब सम्हालिरहेका छन् । झन्डै १२ वर्षपछि फरक भूमिकामा क्लब फर्केका तामाङले ए डिभिजन लिगको पहिलो खेलमा जितको स्वाद चाखे ।

जावलाखेल युवा क्लबलाई १-० ले पराजित गर्दा दोस्रो हाफमा दीनेश राजवंशीले हेडरमार्फत गरेको गोल नै निर्णायक सावित भयो । खेलको अधिकांश समय जावलाखेललाई दबाबमा राखेको मनाङले ३ अंक जोड्यो । खेलपछि बोल्दै प्रशिक्षक तामाङले दिएको अभिव्यक्ति भने केहि आश्चर्य मान्नैपर्ने खालको थियो । कारण उनले ठूलो टोली र स्टार खेलाडी हुँदा प्रशिक्षकका रुपमा धेरै योजना बनाउनु नपर्ने बताए ।

‘स्टार खेलाडीले भरिपूर्ण टोली छ । जावलाखेलविरुद्ध हामीलाई जित चाहिएको थियो । तर ठूलो टोलीमा स्टार खेलाडीहरुलाई खासै धेरै योजना बनाउनु पर्दैन । खेलाडीहरु आफैं अन्तर्राष्ट्रिय अनुभव बोकेका हुन्छन् । उनीहरुलाई कसरि खेल्नुपर्छ थाहा छ । सामान्य छलफल गरेका थियौं, र जित पनि हासिल भयो,’ उनले भने ।

अघिल्लो सिजन नेपाल एपिएफ क्लबको जिम्मेवारी सम्हालेका तामाङले २०७२ सालमा रुस्लान थ्री स्टारले राष्ट्रिय लिगको उपाधि जित्दा पनि टोली सम्हालेका थिए । यसपटक मनाङ उपाधि दाबेदारको रुपमा खेलिरहँदा विजयी सुरुवात गर्न सफल भयो । अन्जन विष्ट, दीनेश राजवंशी र पुजन उपरकोटीजस्ता राष्ट्रिय टोलीका नियमित खेलाडी टोलीमा छन् । विदेशी खेलाडीका रुपमा फरवार्डद्वय आदेलाजा सोमिडे र ओलावाले आफिजसँगै मिडफिल्डर दयानन्द सिंह छन् । राष्ट्रिय टोलीमा परिसकेका नितिन थापा, आदित्य चौधरी र विशाल सुनार पनि मनाङकै जर्सीमा खेलिरहेका छन् ।

प्रशिक्षक तामाङले जावलाखेलविरुद्ध मिडफिल्डमा बल राख्न नसक्दा केहि समस्या परेको भने स्वीकारे । ‘हामीले जित निकाल्यौं तर सहज भने भएन । जावलाखेलले हामीलाई सोचेजस्तो बल राख्न दिएन । उनीहरुले पनि केहि अवसर सिर्जना गरे,’ उनले भने, ‘पुजन, नितिन र दयाको जोडी पहिलो पटक खेलेको हो । तीन जना अन्तर्राष्ट्रिय स्तरका खेलाडी हुन् र उनीहरुलाई एक आपसमा खेल्नेबारे थाहा छ । बल होल्ड गर्ने हो कि, एक आपसमा पास गर्ने हो वा विंग प्ले गर्ने हो, त्यो निर्णय गर्न सक्छन् । आउने खेलमा समन्वय सुधार होला ।’

प्रशिक्षक तामाङले नितिन पहिलो पटक टोलीमा खेलिरहेका कारण जम्न केहि समय लाग्ने बताए । ‘नितिन पहिलो पटक टोलीमा खेल्दैछ । आज त्यसैले पनि अलि विश्राम दिन चाडै निकाले । आउने दिनमा तीन मिडफिल्डरबीच समन्वय सुध्रन्छ,’ तामाङले भने । तामाङसँगै नाइजेरियन प्रशिक्षक तोपे फुजा मनाङको प्रशिक्षण टोलीमा रहनेछन् । फुजा भिसाका समस्याले गर्दा यसै साता मात्र नेपाल आइपुग्नेछन् ।

यता जावलाखेलका प्रशिक्षक किशोर केसीले टोलीले पाएको अवसर सदुपयोग गर्न नसक्दा हार बेहोरेको बताए । ‘ मनाङ राम्रो टोली हो । तर हामीले पनि अवसर सिर्जना गरेका हौं । अन्त्यसम्म पनि हामीले गोल गर्न प्रयास गर्यौं । खेलाडीले मिहिनेत गरेका हुन्, नतिजा सोचेजस्तो भएन,’ उनले भने ।