काठमाडौं (हाम्रो खेलकुद) – नेपाल आयल निगम मनाङ–मस्र्याङ्दी क्लबले नयाँ सिजनको कतार एयरवेज सहिद स्मारक ‘ए’ डिभिजन लिगमा विजयी सुरुआत गरेको छ । मनाङले जावलाखेल युथ क्लबलाई १–० ले पराजित गर्दै लिगमा सुखद् सुरुआत गरेको हो ।

मनाङको जितमा दोस्रो हाफमा दिनेश राजवंशीले गरेको गोल नै निर्णायक बन्यो । उनले ५७औं मिनेटमा गोल गरेका थिए । त्रिपुरेश्वरस्थित दशरथ रंगशालामा आइतबार भएको खेलको पहिलो हाफमा दुवै टोलीले गोलको कुनैपनि उल्लेख्य मुभ सिर्जना गर्न सकेको थिएन ।

३१औं मिनेटमा पुजन उपरकोटीको फ्रिकिकमा एडिलाजा सोमिडेको मिलाईदिएको हेडर पासमा ओलावाले आफिजले गोल गरेपनि अफसाइड ठहरिदा उनको गोलले मान्यता पाएन ।

४५औं मिनेटमा सुरज ज्यु ठकुरीको कर्नरमा ओनागुना एनकेंगे जुनियरको हेडर क्रसबारमा लागेर फर्कदा जावलाखेल अग्रता लिनबाट चुक्यो । ४९औं मिनेटमा हुलमुलमा दयानन्द सिंहले गरेको प्रहार पोस्टबाट आकासिदा मनाङ अग्रता लिनबाट चुक्यो ।

५४औं मिनेटमा एडिलाजा सोमेडेको क्रसमा गोलरक्षक अघि बढेको अवस्थामा अन्जन विष्टको हेडर पोस्ट नजिकैबाट बाहिरिदा मनाङले अग्रता लिन सकेन । ५७औं मिनेटमा दयानन्द सिंहको कर्नरमा दिनेश राजवंशीले हेडरमार्फत गोल गर्दै मनाङलाई १–० को अग्रता दिलाए । गोलरक्षक तथा कप्तान टेकेन्द्र सिंह थापा अघि बढेको अवस्थामा दिनेशको हेडरले जाली चुम्न पुगेको थियो ।

७३औं मिनेटमा जुनियरको पासमा सुनिल खड्काले सुवर्ण अवसर खेर फाल्दा जावलाखेल बराबरीबाट चुक्यो । ८९औं मिनेटमा अन्जन विष्टको पासमा ओलावाले अफिजले डि बक्समा सुवर्ण अवसर पाएपनि उनको प्रहार पोस्ट नजिकैबाट बाहिरियो । त्यसपछि थप गोल निस्कन दिनेशको गोल नै मनाङलाई ३ अंक जोड्न पर्याप्त बन्यो । जितपछि मनाङले ३ अंक जोडेको छ । जावलाखेलले अंक जोड्न सकेन ।

लिगमा सोमबार पहिलो खेलमा त्रिभुवन आर्मी फुटबल क्लब र नेपाल पुलिस क्लबबीच तथा दोस्रो खेलमा मच्छिन्द्र फुटबल क्लब र न्युरोड टिम (एनआरटी) बीच प्रतिस्पर्धा हुनेछ । खेल १ बजे र ४ः४५ बजे हुनेछ ।