काठमाडौं (हाम्रो खेलकुद) – नेपाली फुटबल टोलीका कप्तान विराज महर्जनले टोलीको एकताले नै एएफसी सोलिडारिटी कप जित्न सफल भएको बताएका छन् । मलेसियाको कुचिङमा मंगलबार राती मकाउलाई १–० ले हराउँदै नेपालले पहिलो पटक एसियाली फुटबल महासंघ (एएफसी) को आधिकारित प्रतियोगिता पहिलो पटक जितेको थियो ।

नेपाललाई लगातार तेस्रो उपाधि दिलाउँदा टोलीको कप्तानी गरेका विराजले बुधबार राती त्रिभुवन विमानस्थलबाट निस्कने क्रममा भने,‘ च्याम्पियन बन्ने लक्ष्यका साथ गएका थियौं । सबैले एकजुट भएर प्रदर्शन गर्दा लक्ष्यमा सफल भयौं । सबैले आ आफ्नो ड्यूटी परा गरेका छन् । ’ माघमा बंगलादेशमा सम्पन्न बंगबन्धु गोल्डकप अन्तर्राष्ट्रिय आमन्त्रण गोल्डकप र फागुनमा नेपालले दक्षिण एसियाली खेलकुद (साग) को यू २३ फुटबलमा स्वर्ण जित्दा पनि विराज नै कप्तान थिए ।

यसपटक च्याम्पियन हुने क्रममा टिमोर लिस्टेसँग गोलरहित बराबरी खेलेपनि त्यसपछि ब्रुनाईलाई ३–० हराउँदै सेमिफाइनल पक्का गरेको थियो । लाओसलाई सेमिफाइनलमा २–२ को बराबरीपछि टाइब्रेकरमा हराएको नेपालले फाइनलमा मकाउलाई पराजित गरेको थियो । ब्रुनाईविरुद्ध नवयुग श्रेष्ठ, भरत खवास र विमल घर्तीमगर ले तथा सेमिफाइनलमा विमल र अनन्त तामाङले गोल गरेका थिए । फाइनलमा एकमात्र गोल सुजल श्रेष्ठले गरेको थियो ।

युवा तथा खेलकुद मन्त्री दलजित श्रीपाली, राष्ट्रिय खेलकुद परिषद्का सदस्य सचिव केशवकुमार विष्ट, अखिल नेपाल फुटबल संघका पदाधिकारी, खेलाडीका परिवार, विभिन्न उमेर समूहका खेलाडी र समर्थकले टोलीलाई विमानस्थलमा स्वागत गरेको थियो । विमानस्थलबाट सुरु भएको र्याली गौशला, मैतीदेवी हुँदै भद्रकाली, त्रिपुरेश्वर, पुल्चोक, मंगलबार हुदै एन्फा कम्प्लेक्स सातदोबाटो पुगेर टुंगिनेछ ।