काठमाडौं (हाम्रो खेलकुद) – राष्ट्रिय फुटबल टोलीका फरवार्ड अन्जन विष्टको कप्तानीमा मनाङ मर्स्याङ्दी क्लबले सहिद स्मारक ए डिभिजन लिग २०७८ को लागि टोली घोषणा गरेको छ ।

मनाङले केहि नयाँ खेलाडीलाई क्लबमा अनुबन्ध गर्दै २३ सदस्यीय टोली घोषणा गरेको हो । टोलीको गोलरक्षकमा विशाल सुनार, अशोक बराल र तोप बहादुर राना छन् । त्यस्तै गत सिजन टोलीमा रहेका विमल राना, निशान लिम्बु, पुजन उपरकोटी र आदित्य चौधरी यसपटक पनि टोलीमा नियमित छन् । विदेशी खेलाडीमा मनाङले ओलावाले आफिजलाई निरन्तर राख्दा भारतीय मिडफिल्डर दयानन्द सिंह एलाब्गम पनि टोलीमा छन् । राष्ट्रिय टोलीका डिफेन्डर दीनेश राजवंशी र मिडफिल्डर नितिन थापा यो सिजन मनाङको जर्सीमा देखिनेछन् ।

अर्का विदेशी फरवार्ड सोमिडे आदेलाजा मनाङ फर्किएका छन् । डिफेन्डर फ्रान्क्लिन क्वेटे टाला नेपाल सुपर लिगमा प्रभाव जमाएपछि मनाङमा अनुबन्धित भएका छन् । मिडफिल्डर रुपेश केसी र अनुभवी फरवार्ड दीपक राई पनि पुन: मनाङको जर्सीमा देखिनेछन् । मिडफिल्डमा विश्व अधिकारी र डिफेन्डरद्वय प्रवेश दनुवार र सरोज योन्जन मनाङ आएका छन् ।

मनाङले क्लबकै पूर्व खेलाडी राजेन्द्र तामाङलाई प्रशिक्षकमा नियुक्त गरेको छ । उनीसँगै नाइजेरियन तोपे फुजा क्लबको प्रशिक्षक रहनेछन् । क्लबले विनोद डंगोललाई गोलरक्षक प्रशिक्षक नियुक्त गरेको छ । व्यवस्थापकमा रामबहादुर गुरुङ तथा फिजियोमा कर्मा छोदेन गुरुङ रहेकी छिन् ।

मनाङले लिगको पहिलो खेलमा जावलाखेल युवा क्लबको सामना गर्दैछ । खेल आइतबार दिउँसो ४:४५ बजे दशरथ रंगशालामा हुनेछ ।

मनाङको पूर्ण टोली :

अन्जन विष्ट (कप्तान), अशोक बराल, विमल राना, निशान लिम्बु, विश्व अधिकारी, सरोज योन्जन, दीपक राई, फ्रान्क्लिन क्वेटे टाला, एकराज बुढाथोकी, नरेन्द्र चौधरी, तोपबहादुर राना, दिनेश घर्तिमगर, रुपेश केसी, प्रवेश दनुवार, पुजन उपरकोटी, विशाल सुनार, नितिन थापा, दीनेश राजवंशी, आफिज ओलावाले, आदेलाजा सोमिडे, आदित्य चौधरी, प्रशान्त लामा, दयानन्द सिंह, सुजल श्रेष्ठ (जुनिअर)