काठमाडौं (हाम्रो खेलकुद) – सहिद स्मारक ए डिभिजन लिगमा डेब्यु गर्ने तयारीमा रहेको सातदोबाटो युवा क्लबले टि१० सँग खेल सामाग्री प्रायोजन सम्झौता गरेको छ ।

भाटभटेनी होल्डिङ कम्पनी आधिकारिक विक्रेता रहेको टि१० ले ए डिभिजन क्लब सातदोबाटोसँग तीन वर्षको सम्झौता गरेको हो । सम्झौता अनुसार टि१० सातदोबाटो युथ क्लबको आधिकारिक किट पार्टनर रहनेछ । टि१० ले टोलीलाई आवश्यक पर्ने सम्पूर्ण खेल सामाग्री प्रदान गर्नेछ ।

प्रायोजनसँगै टि१० ले क्लबको लिग पोजिसन अनुसार बोनस दिने समेत बताएको छ ‌‌। सम्झौताले ए डिभिजनको नवप्रवेशी क्लब सातदोबाटोको लिग यात्रा थप मजबुत रहने विश्वास टि१० ले राखेको छ ।

टि१० लाई आइपीएलको पञ्जाव किंग्स, राष्ट्रिय क्रिकेट टिमहरु ओमान, अमेरिका, कुवेत र अन्य उदीयमान देशलाई प्रायोजन गर्दै आएको छ । दिल्ली डायनामोज, हैदरावाद एफसी, गोवा एफसी, आईएसएलको ओडिसा एफसी, भुटानको पारो एफसी जस्ता फुटबल टिमसँग समेत सहकार्य गरेको छ । योसँगै दौड, साइक्लिङ सहित अन्य खेल क्षेत्रमा यसले सेवा विस्तार गर्दै आएको छ ।

भाटभटेनी होल्डिंगले आफ्ना सबै १९ वटा डिपार्टमेन्टल स्टोरको माध्यमबाट टि १० स्पोर्टस ब्राण्डको खुदा बिक्री गर्दै आएको छ ।

सातदोबाटोले लिगको उद्घाटन खेलमा फ्रेन्ड्सको सामना गर्दैछ ‌‌। खेल मंसिर ३ गते ४:४५ बजे दशरथ रंगशालामा हुनेछ ।