काठमाडौं (हाम्रो खेलकुद) – डच प्रशिक्षक हान एबिङले पुन: एकपटक सेन्ट्रल जोन भलिबल च्याम्पियनसिपमा नेपाली पुरुष राष्ट्रिय भलिबल टोलीको प्रशिक्षण सम्हाल्ने भएका छन् ।

नेपाल भलिबल संघको बिहीबार बसेको कार्यसमिति बैठकले यसअघि नेपाललाई प्रशिक्षण दिइसकेका हान एबिङलाई नै प्रशिक्षकको रुपमा ल्याउने निर्णय गरेको हो । उनी २ मंसिरमा नेपाल आइपुग्ने संघका सचिव मनवीर छन्त्यालले जानकारी गराए ।

हानले यसअघि नेपालमै भएको पुरुष सेन्ट्रल जोनमा पुरुष टोलीलाई प्रशिक्षण दिएका थिए । त्यसबेला नेपालको यात्रा समूह चरणमा नै सिमित रहेको थियो । उनको खर्च विश्व भलिबलको सर्वोच्च निकाय एफआईभिबीले बेहोर्ने छ । नेपालको पुरुष र महिला टिमले बंगलादेशमा डिसेम्बर २१ देखि २९ सम्म हुने सेन्ट्रल जोन खेल्दैछ ।

पुरुष टिमका लागि गत असोजमा भएको एनभिए क्लब भलिबल च्याम्पियनसिपमा उत्कृष्ट प्रदर्शन गरेका खेलाडीबीच छनोट गराई अन्तिम बन्द प्रशिक्षण थालिने संघले जनाएको छ । छनोट ३ र ४ मंसिरमा हुनेछ । त्यसपछि टोलीको बन्द प्रशिक्षण सुरु हुनेछ ।

यस्तै संघको बैठकले सेन्ट्रल जोनकै कारण डिसेम्वरकै लागि तय भएको फ्रेन्चाइज भलिबल सर्ने बताएको छ । नयाँ मिति अनुसार फ्रेन्चाइज भलिबल ६ देखि २८ माघसम्म आयोजना हुनेछ । त्यसपछि फागुनमा नेपाली सेनाले आयोजना गर्ने प्रधानसेनापति भलिबल हुनेछ । नेपाल भलिबल संघले आयोजना गर्ने एनभिए लिग कञ्चनपुरमा गराउने निर्णय गरेको छ ।