काठमाडौं (हाम्रो खेलकुद) – होङ्गान्जी न्यु डायमन्ड स्पोर्ट्स क्लब वाई वाई डाइनामाइट छैटौं एनभिए राष्ट्रिय महिला तथा पुरुष क्लब भलिबल च्याम्पियनसिपको महिलातर्फ समूह विजेता बन्दै सेमिफाइनलमा प्रवेश गरेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको समूह ‘बी’ को लिगको अन्तिम खेलमा डायमन्डले विभागीय त्रिभुवन आर्मी क्लबलाई ३–० को सोझो सेटमा हराउँदै समूह ‘बी’ को विजेता बन्यो । डायमन्डसँगको हारका बावजुत आर्मी समूह उपविजेता बन्दै सेमिफाइन्लमा पुग्न सफल भयो ।

प्रतिस्पर्धात्मक पहिलो सेटमा डायमन्डले सुरुवाती अग्रता लिएपनि अन्तिम समयमा सेट पोइन्टमा भने आर्मीले २४–२३ अग्रता लिएपनि डायमन्डले २७–२५ को जित निकाल्न सफल भयो । दोस्रो सेटमा डायमन्डले एक समय १६–८ को आरामदायी अग्रता लिएपनि लगातार अंक गुमाउँदा खेल १८–१७ को स्थितिमा आएपनि डायमन्डले २५–२२ को जित निकाल्दै जिततर्फ अघि बढ्यो ।

तेस्रो सेटमा ५–५ को बराबरीबाट डायमन्डले लगातार ४ अंक जोड्दै ९–५ को अग्रता लिएपनि आर्मीले लगातार ६ अंक जोड्दै ११–९ को अग्रता लिएको थियो । त्यसपछि खेलमा फर्किएको डायमन्डले अग्रता लिदै २५–२३ को जित निकाल्दै विजयी हुन सफल भयो ।

यो सँगै महिलातर्फको सेमिफाइनल समिकरण पुरा भएको छ । अब सेमिफाइनलमा समूह ‘ए’ को विजेता नेपाल एपीएफ क्लब र समूह ‘बी’ को उपविजेता त्रिभुवन आर्मी क्लब तथा समूह ‘बी’ को विजेता डायमन्ड र नेपाल पुलिस क्लबबीच प्रतिस्पर्धा हुनेछ । दुवै सेमिफाइनल शुक्रबार हुनेछ ।

त्यसअघि दुई विभागीय डर्वी भिडन्तमा नेपाल पुलिस क्लबको चुनौती ३–१ ले पन्छाउँदै नेपाल एपीएफ क्लब समूह विजेताबन्न सफल भयो । एपीएफसँगको हारसँगै पुलिस समूह उपविजेता बन्यो ।

पुरुषतर्फ आज (बिहीबार) नै क्वाटरफाइनलमा चार खेल हुनेछ । क्वाटरफाइनलमा टिप टप हेल्प नेपाल स्पोर्ट्स क्लब र नयाँ बजार सामाजिक युवा क्लब, नेपाल पुलिस क्लब र ढोरपाटन क्लब, त्रिभुवन आर्मी क्लब र गल्कोट स्पोर्ट्स क्लब तथा नेपाल एपीएफ क्लब र गण्डकी प्रदेशबीच खेल हुनेछ ।