काठमाडौं (हाम्रो खेलकुद) – त्रिभुवन आर्मी अफिसर्स गल्फ क्लब नेपाल टुरिजम गल्फ प्रतियोगिताको क्लब च्याम्पियन बनेको छ । १३ औं दक्षिण एसियाली खेलकुदका दोहोरो स्वर्ण विजेता सुवास तामाङ र मेजर निश्चय जंग रायमाझीको जोडीले काउन्ट ब्याकका आधारमा उपाधि जितेका हुन् ।

पहिलो दिनको खेलमा २ स्ट्रोकले पछि परेपनि दोस्रो तथा अन्तिम दिन मंगलबार पुनरागमन गर्दै आर्मी उपाधि जित्न सफल भयो । आर्मीसँगै गोकर्ण गल्फ क्लबका सद्भाव आचार्य र टासी छिरिङको जोडीले समग्रमा १२ ओभर ३ सय को स्कोर जोडेका हुन् । दोस्रो दिन सुवासले २ अन्डर ७० तथा निश्चयले ५ ओभर ७७ स्कोर जोडेका थिए । गोकर्णका सद्भावले इभन पार ७२ तथा टासीले ५ ओभर ७७ को स्कोर दर्ता गरे ।

गोकर्णले काउन्ट ब्याकमा दोस्रो स्थान हिल गर्दा हिमालयन गल्फ कोर्ष पोखरा ४९ ओभर ३ सय ३७ स्कोरसहित तेस्रो भयो । चौथो स्थानको धरान गल्फ क्लबले ५२ ओभर ३ सय ४० स्कोर जोड्दा रोयल नेपाल गल्फ क्लब १ स्ट्रोकले पछि पर्दै पाँचौ भयो ।

नेपाल गल्फ संघको आयोजनामा जारी प्रतियोगिताको कर्पोरेट गल्फ इभेन्ट बुधबार हुनेछ । ९२ गल्फर सहभागी प्रतियोगिता स्टेबलफर्ड फर्म्याटमा ३/४ ह्याण्डीक्याप लागु हुनेछ ।

गत वर्ष कोरोना महामारीका कारण प्रतियोगिता आयोजना हुन सकेको थिएन । यसपटक भने विदेशी पर्यटक आउने सम्भावना नभएपछि अन्तरिक पर्यटन प्रवर्द्धनको लक्ष्यसहित स्थानीय खेलाडी तथा कुटनीतिक नियोगका प्रतिनिधि समेटेर प्रतियोगिता गरिएको हो ।