काठमाडौं (हाम्रो खेलकुद) – नेपाली महिला राष्ट्रिय भलिबल टोलीको बन्द प्रशिक्षणमा पर्न सफल होङ्गान्जी न्यु डायमन्ड स्पोर्ट्स क्लबकी युवा उदियमान स्पाइकर रिया कुँवरले आसन्न छैटौं संस्करण एनभिए महिला तथा पुरुष क्लब च्याम्पियनसिप गुमाउने भएकी छिन् ।

प्रशिक्षण दौरान बायाँ घुडामा चोट बोक्न पुगेपछि उनले च्याम्पियनसिप गुमाउने पक्का भएको प्रशिक्षक कुमार राईले हाम्रो खेलकुदलाई जानकारी गराए । आगमी १० असोजदेखि सुरु हुने एनभिए क्लब च्याम्पियनसिपकै प्रशिक्षण दौरान न्यु डायमन्डको आफ्नै कोर्टमा रियाले स्पाइकका लागि जम्प गर्ने प्रयास गर्दा दुखाई महसुस गर्दै घुडाँमा सामान्य चोट बोक्न पुगेकी थिइन् ।

त्यसपछि उनलाई क्लबको मेडिकल पार्टनर अर्थाेप्लास्टमा लगिएको थियो । त्यहाँ फिजियोसँग केहि समय रिह्याब गरेपछि फिट भएपछि उनी पुन प्रशिक्षणमा फर्किएकी थिइन् । पुनः दुखाई महसुस गरेपछि राष्ट्रिय ट्रमा सेन्टरमा एमआरआई गरिएको थियो । एमआरआई परिक्षणमा उनको घुडाँको एसिएल (एन्टेरिएर क्रुसिएट लिगामेन्ट) च्यातिएको र शल्यक्रिया नै गर्नुपर्ने भएको हो । उनको शल्यक्रिया डाक्टर भद्र हमालको नेतृत्वको टोलीले गर्नेछ ।

सोमबार ट्रमा सेन्टरमा उनको घुडाँको शल्यक्रिया हुनेछ । शल्यक्रियापछि उनी कम्तीमा पनि ९ महिना मैदान बाहिर रहने सम्भावना छ । पछिल्लो समय रियालाई नेपाली भलिबलमा योगदान दिन सक्ने खेलाडीको रुपमा हेरिएको छ । १५ वर्षीय रियाले एसियन महिला भलिबल च्याम्पियनसिपको लागि नेपाल भलिबल संघले छनोट गरेको ३० सदस्यीय टोली हुदै १८ सदस्यीय टोलीमा स्थान बनाउन सफल भएकी थिइन् । नेपाल भलिबल संघले रियाको उपचारको लागि राष्ट्रिय खेलकुद परिषद (राखेप) लाई आवश्यक पत्र पठाइसकेको छ ।