काठमाडौं (हाम्रो खेलकुद) – एनभिए लिग च्याम्पियन टिप टप हेल्प नेपाल स्पोर्ट्स क्लबले युवा प्रशिक्षक उत्सव खड्कालाई टोलीको मुख्य प्रशिक्षकमा नियुक्त गरेको छ ।

क्लबको शुक्रबार बसेको बैठकले २८ वर्षीय खड्कालाई दीर्घकालीन रुपमा टोलीको मुख्य प्रशिक्षकमा नियुक्त गरिएको क्लबका महासचिव अरुण श्रेष्ठले जानकारी गराए । उनले असोज १० बाट सुरु हुने भनिएको छैटौ संस्करणको एनभिए राष्ट्रिय महिला तथा पुरुष क्लब भलिबल च्याम्पियनसिपदेखि प्रशिक्षण सम्हालनेछन् ।

‘हामीले दीर्घकालीन रुपमा अघि बढ्ने योजना अनुरुपमा प्रशिक्षण कोर्समा डिप्लोमा गरिसकेका उत्सवलाई मुख्य प्रशिक्षक बनाएको हौं । उनको र क्लबको योजना मिलेपछि सहकार्यको वातावरण बनेको हो,’ महासचिव श्रेष्ठले भने, ‘खेलाडी उत्पादन गर्ने हाम्रो योजना हो । अब उनको आगमनसँगै क्लबको नियमित प्रशिक्षण गर्ने योजना छ । अहिलेका लागि नयाँ बसपार्कमा नै हेल्प नेपालको प्रशिक्षण हुनेछ । उनको क्षमता हेरेर नै हामीले उनलाई प्रशिक्षकमा नियुक्त गरेका हौं ।’

प्रशिक्षक खड्का यसअघि जावलाखेल भलिबल प्रशिक्षण केन्द्रको प्रशिक्षक रहेका थिए । विभिन्न जिल्लाहरुमा प्रशिक्षण दिइसकेका खड्काले उनले भारतको पाटियालाबाट नेताजी सुभाष नेशनल इन्स्टिच्युट अफ स्पोर्ट्सबाट २०१९ मा कोचिङको डिप्लोमा कोर्स पुरा गरेका छन् ।

यस्तै महासचिव श्रेष्ठले एनभिए राष्ट्रिय महिला तथा पुरुष क्लब भलिबल च्याम्पियनसिप १ असोजबाट नयाँ बसपार्कमा प्रशिक्षण थालिने बताए । उनले च्याम्पियनसिपका लागि खेलाडी अनुबन्धको कार्य तीव्र गतिमा भइरहेको समेत बताए । गत चैतमा सम्पन्न एनभिए लिगको फाइनलमा एपिएफलाई हराउँदै हेल्प नेपाल च्याम्पियन बनेको थियो ।

त्यसबेला टोलीलाई च्याम्पियन बनाउन महत्त्वपूर्ण भुमिका निर्वाह गरेका भारतीय राष्ट्रिय टोलीका विनितसहित अन्य खेलाडीसँग छलफल भइरहेको बताए । भारतीय सेनामा कार्यरत नेपाली ओपन स्पाइकर अमृत केसी र मिडल ब्लकर याम क्षेत्री भने यसपटक टोलीमा नरहने महासचिव श्रेष्ठले बताए । उनीहरु भारतीय सेनाकै आन्तरिक प्रतियोगितामा व्यस्त रहने भएका कारण यसपटकको च्याम्पियनसिपमा उपस्थित हुन नसक्ने भएका हुन् ।