काठमाडौं (हाम्रो खेलकुद) – टोकियो २०२० पारालिम्पिकको तेक्वान्दोमा पलेशा गोवर्द्धन रेपेचेजतर्फ फाइनलमा पराजित भएकी छिन् । चीनकी युजी लीसँग १२-९ ले पराजित भएपछि पलेशा नेपाली खेलकुदको इतिहासमा पहिलो ओलम्पिक पदक जित्नबाट बन्चित भइन् । यो खेल जितेको अवस्थामा उनले कास्य पदक हात पार्ने थिइन् ।

कास्य पदक भिडन्तमा चीनकी लीसँग पहिलो राउन्डमा पलेशाले ४-२ को अग्रता लिएकी थिइन् । दोस्रो राउन्डमा लीले ५-० ले जित्दै समग्रमा ७-४ को अग्रता लिइन् । तेस्रो चरणमा एक समय खेल ९-९ को बराबरीमा पुगेपनि समग्रमा १२-९ को जितसहित लीले कास्य पदक जितिन् ।

त्यसअघि महिला के४४ विधाको ५८ केजी तौल समूहमा प्रतिस्पर्धा गरेकी पलेशा प्रतियोगिताको पहिलो खेलमा बेलायतकी बेथ मुनरोसँग पराजित भएकी थिइन् । पलेशा २१–८ ले पराजित भएपछि स्वर्ण पदकको सम्भावना समाप्त हुँदा रेपेचेजमार्फत कास्य पदकका लागि भने प्रतिस्पर्धा गर्ने भएकी थिइन् ।

रेपेचेजतर्फ पलेशाले क्वाटरफाइनलमा अमेरिकी खेलाडीलाई पराजित गरिन् । अमेरिकी ब्रायना सालिनारोलाई १०-० ले पराजित गरेपछि सेमिफाइनलमा प्रवेश गरेकी थिइन् । ओलम्पिक स्पर्धामा नेपालका कुनैपनि खेलाडीले जित हासिल गरेको यो नै पहिलो अवसर थियो ।

पलेशाले सेमिफाइनलमा सर्बियाकी मिसेभलाई हराउँदै पदक भिडन्तमा स्थान पक्का गरेकी थिइन् । मिसेभले पहिलो चरणमा ४-४ को बराबरी गरेपनि दोस्रोमा ७-२ र तेस्रोमा १२-९ को स्कोरले पलेशा समग्रमा २३-१५ ले विजयी रहिन् । यस जितले उनको लीसँगको भिडन्त पक्का भएको थियो ।

पलेशा प्रशिक्षक कविराज लामासहित ६ सदस्यीय टोली भदौ ४ गते जापान पुगेको पुगेको थियो । पलेशाले यसअघि एसियन च्याम्पियनसिपमा कास्य र विश्व च्याम्पियनसिपमा पनि सहभागिता जनाइसकेकी थिइन् । उनले कोरोना संक्रमणका कारण अन्तर्राष्ट्रिय उडान हुन नसक्दा पारालिम्पिक छनोट खेल्न पाएकी थिइनन् । तर पछि वाइल्डकार्डमा नाम परेपछि उनको यात्रा तय भएको थियो ।