एजेन्सी – टोकियो ओलम्पिक २०२० अन्तर्गत पुरुषतर्फ हाइ जम्प इभेन्टमा कतारका मुताज एस्स बर्शिम र इटालीका जियानमारको ताम्बेरी दुवै जनाले स्वर्ण पदक जितेका छन् ।

झन्डै २ घण्टा चलेको प्रतिस्पर्धापछि दुवै खेलाडीले समान २.३७ मिटरको उचाइ पार गरेका थिए । दुवै खेलाडीलाई अर्को एक अवसर दिएर विजेता छिनोफानो गर्ने अवसर दिइएको थियो । तर दुवैले खेलभावनाको कदर गर्दै पदक बाँड्ने निर्णय लिए । दुवैले सँगै जितको खुसी पनि साटेका थिए ।

२.३७ मिटर दुरी पार गरेपछि दुवै जनाले २.३९ मिटरको ओलम्पिक कीर्तिमान बराबरीका लागि प्रयास गरेका थिए । तर तीन प्रयासमा असफल भएपछि पुरानो नतिजामा कुनै असफल नभएका उनीहरुलाई खेलका अफिसियलले अर्को प्रयास गर्ने सहमतिका लागि प्रश्न गरे । उनको प्रश्नमा कतारका बर्शिमले दुवैले जित्न सकिनेबारे प्रतिप्रश्न गरे । अफिसियलले सम्भव भएको बताउन नपाउँदै कतार र इटालीका खेलाडीले एक आपसमा अंकमाल गर्दै पदकको खुसी साटे । सन् १९१२ यता एथलेटिक्समा पदक बाँडिएको पहिलो अवसर हो ।

#Tokyo2020 #ita

“can we have two golds?” 🥺🤍

This was so cute. They both had the same injury, they both knew how important is an olimpic gold, they're friends and decided to go to the podium together. This is the best thing you will see today.
Italy ❤️ Qatar. pic.twitter.com/sg74U4YnRG

— asistan 𝐬𝐡𝐚𝐫𝐨𝐧 🙂 (@mavieyes_) August 1, 2021

यसै स्पर्धामा बेलारुसका माक्सिम नेदसेकाउले कास्य जिते । उनले पनि २.३७ मिटर उचाइ पार गरेका थिए । तर उनी त्यसअघि प्रयासमा असफल भएका थिए ।

बर्शिम र ताम्बेरीबीच मैदानबाहिर पनि राम्रो सम्बन्ध रहेको छ । रियो ओलम्पिक दौरान करिअर नै धरापमा पर्ने चोट बोकेका ताम्बेरीले खुसियाली मनाउने क्रममा उक्त चोटका क्रममा राखिएको प्लास्टरसहित तस्बिर खिचेका थिए । बर्शिम पनि चोटबाट पुनरागमन गर्दै स्वर्ण जित्न सफल भएका हुन् ।

बर्शिमको पदकसँगै कतारले ओलम्पिक इतिहासमा दोस्रो स्वर्ण जितेको छ । यसअघि शनिबार भएको भारोत्तोलनको पुरुष ९६ किलो तौल समूहमा फारेस एल्बाखले कतारलाई पहिलो स्वर्ण दिलाएका थिए । बर्शिमले विश्व च्याम्पियनसिपमा पनि लगातार स्वर्ण जितेका थिए ।