काठमाडौं (हाम्रो खेलकुद) – टोकियो ओलम्पिक २०२० अन्तर्गत जुडोतर्फ नेपालकी सोनिया भट्टले पहिलो चरणमा रसियाकी डोल्गोभा इरिनासँग खेल्ने भएकी छिन् । सोनियाले जुलाई २४ मा प्रतिस्पर्धा गर्नेछिन् ।

विहीबार भएको खेल तालिका सार्वजनिक समारोहमा ४८ केजी तौल समूहमा सोनियाको भेट इरिनासँग हुने पक्का भएको हो । डोपिङ प्रकरणका कारण प्रतिबन्धमा परेको रुस ओलम्पिकमा देशका रुपमा सहभागी छैन । अर्थात ओलम्पिकमा रुसको राष्ट्रिय झन्डा र राष्ट्रिय गान बजाइने छैन । रसियाका खेलाडीले रुस ओलम्पिक कमिटीको झन्डा मुनि प्रतिस्पर्धा गर्नेछन् ।

सोनियाकी प्रतिद्वन्द्वी इरिना विश्व वरीयतामा नवौं स्थानमा छिन् । यस प्रतियोगितामा भने उनी आठौं वरीयताकी खेलाडी हुन् । इरिनाले यसै मे महिनामा भएको कजान ग्रान्डस्लाममा रजत पदक जितेकी थिइन् । नेपालकी सोनिया भट्ट भने विश्व वरीयतामा १ सय २७ औं स्थानमा छिन् । उनी वाइल्डकार्ड मार्फत ओलम्पिकमा छनोट भएकी हुन् ।

सोनिया र प्रशिक्षक सूर्यनारायण श्रेष्ठ केहि दिन अघि नै टोकियो पुगिसकेका छन् । सोनियाले नेपालमा आयोजना भएको १३ औं दक्षिण एसियाली खेलकुदमा कास्य पदक जितेकी थिइन् । उनले जुनियर विश्व च्याम्पियनसिपमा पनि सहभागिता जनाइसकेकी छिन् ।

खेल तालिका:

यो पनि : टोकियो ओलम्पिक : नेपाली खेलाडी खेल्ने सम्पूर्ण विवरण