भुपेन्द्र जिसी, काठमाडौं

राष्ट्रिय टोलीबाट खेल्ने खेलाडीको सबैभन्दा ठूलो सपना हुने गर्दछ । देशको जर्सी लगाएर एक साथ मैदान उत्रने अवसर सहोदर दाजुभाइले बिरलै पाउँछन् । घरपरिवारको साथ र सहयोगमा खेलाडीको सफलता र असफलतामा प्रभाव पार्दछ ।

दाईको काम वा खेलको प्रत्यक्ष वा अप्रत्यक्ष प्रभाव भाईलाई पनि पर्छ । दाईको सपना पनि भाईलाई आफूभन्दा राम्रो बनाउने हुन्छ । आफूले खेलेको खेल होस् वा अन्य कुनै काममा । दाजुभाई एउटै खेल खेल्दा दुवैलाई सहज हुनुको साथै सफलताको शिखर चुम्न सहज हुन सक्छ ।

खेलकुद सामग्री प्रयोग, कमजोरी औलाउन देखि हौसला प्रदान गर्नसम्म धेरै कुरामा फाइदा हुन्छ । विश्व खेलकुदमा एउटै देशबाटसँगै खेल्ने थुप्रै स्टार दाजुभाईहरु छन् । त्यस्तै नेपाली खेलकुदमा राष्ट्रिय टोलीबाटसँगै खेलेका पाँच दाजुभाई बारे छोटकरीमा जानकारी ।

आरिफ र आसिफ शेख

दाजु आसिफ (बायाँ) र भाइ आरिफ इपिएलका दौरान 

नेपाली क्रिकेटका ब्याट्सम्यान आरिफ र आशिफ शेख ठूलो सम्भावना बोकेका युवा खेलाडी हुन् । दाई आरिफ मध्यक्रम र भाई आसिफले ओपनिङमा ब्याटिङ गर्दछन् । आरिफले मिडियम पेश बलिङ र आसिफ विकेटकिपरको भूमिका निर्वाह गर्दछन् । वैशाख पहिलो साता घरेलु मैदानमा सम्पन्न त्रिकोणात्मक सिरिज शेख दाजुभाईलेसँगै खेलेका थिए । पहिलो खेलमा नेपालले आसिफलाई नेदरल्यान्ड्सविरुद्ध टि२० आईमा डेब्यू दिँदा र आरिफ पनि प्लेइङ ११ मा थिए ।

नेपाललाई ९ विकेटको सहज जित दिलाउन आसिफले डेब्यू खेलमा ५४ रनको अविजित इनिङ खेल्दै धेरैको ध्यान केन्द्रित गरे । आरिफले भने ब्याटिङको अवसर पाएनन् । त्यसपछि आरिफ टोलीमा परेनन् । यसअघि शेख दाजुभाई २०१७ मा बंगलादेशमा भएको एसिसी इमर्जिङ टिम्स एसिया कपमा हङकङविरुद्ध पनिसँगै खेलि सकेका थिए । उक्त खेलमा पनि आरिफले ब्याटिङ गर्न पाएनन् । वीरगञ्जको मुरली चोक हुँदै यी दुईभाई घरेलु प्रतियोगिता र लिग प्राय विपरित टोलीबाट खेल्दै आएका छन् । आरिफ नेपाल पुलिस र आशिफ नेपाल एपिएफ क्लबमा आबद्ध छन् ।

हरिहजुर र द्वारिका थापा

दाजु हरिहजुर (बायाँ) र भाइ द्वारिका १३ औं सागको उद्घाटन समारोहमा

हरिहजुर थापा र द्धारिका थापा नेपाली भलिबलका चर्चित हुन् । सेटर हरिहजुर दाई र मिडिल ब्लकर द्धारिका भाई हुन् । ओखलढुङ्गामा जन्मिएका यी दुई दाजुभाईले घरेलु भलिबलमा लगातार आफ्नो प्रभाव जमाउँदै आएका छन् । हरि त्रिभुवन आमी क्लबबाट प्रतिनिधित्व गर्नुको साथै नेतृत्व गर्दै आएका छन् । द्धारिका नेपाल पुलिस क्लबका प्रमुख खेलाडी हुन् ।

गत वर्ष नेपालमा सम्पन्न १३ औं दक्षिण एसियाली खेलकुद (साग) अन्तर्गत भलिबलमा थापा दाजुभाई नेपाली भलिबल टोलीबाटसँगै खेलेका थिए । राष्ट्रिय टोलीबाटसँगै थापा दाजुभाईले खेलेको यो मात्र एक प्रतियोगिता हो । १३ साग पछि कोरोना महामारीको कारण भलिबलको अन्तर्राष्ट्रिय खेल हुन सकेको छैन । घरेलु भलिबलमा यी दाजुभाई एकअर्काविरुद्ध कोर्टमा उत्रने गर्दछन् ।

रञ्जित र विजय धिमाल

भाइ रञ्‍जित (बायाँ) र दाजु विजय रुस्लान थ्री स्टारबाट विराट गोल्डकप उपाधिसँगै

नेपाली राष्ट्रिय फुटबल टोलीका स्टार डिफेन्डर रञ्जित र विजय धिमाल घरेलु प्रतियोगिता प्रायः एकै टोलीबाट खेल्ने गर्दछन् । मोरङका यी दुई दाजुभाईले २०१६ मा मलेसियासँग भएको मैत्रीपूर्ण खेलमा सँगै टोलीमा परेका थिए । रञ्जित नेपाली राष्ट्रिय फुटबल टोलीका नियमित सदस्य हुन् । नेपाली फुटबलमा लगातार खेल्दै महत्वपूर्ण योगदान दिँदै आएका छन् । विजय भने सँगै खेलेको खेलपछि टोलीमा पर्न संघर्षरत छन् ।

घरेलु प्रतियोगितामा यी दाजुभाई प्रायः सँगै खेल्ने गर्दछन् । यी दुई दाजुभाईले २०७१ देखि ७५ सम्म रुस्लान थ्री स्टार क्लबबाट व्यावसायिक फुटबल खेलेका थिए । २०७६ देखि भने दुवै मछिन्द्रबाट खेल्दै आएका छन् । नेपाल सुपर लिगमा पनि यी दाजुभाईले विराटनगरबाट खेलेका थिए ।

अञ्जन र रञ्जन विष्ट

भाइ अन्जन (बायाँ) र रन्जन सोलिडारिटी कप उपाधिसँगै

मिडफिल्डर अञ्जन र फरवार्ड रञ्जन विष्ट नेपाली फुटबलका चर्चित नाम र दाजुभाई जोडी हुन् । यी दाजुभाईले घरेलु र राष्ट्रिय टोलीबाट खेल्दै आफ्नो प्रभाव जमाउँदै आएका छन् । नेपाली फुटबलले पछिल्लो समय प्राप्त गरेका महत्वपूर्ण सफलतामा यी दाजुभाईको योगदान पनि महत्वपूर्ण छ ।

नेपालले पछिल्लो समय बंगबन्धु गोल्डकप, एएफसी सोलिडारिटी र १२ औं साग जित्दा विष्ट दाजुभाई नेपाली टोलीको महत्वपूर्ण सदस्य थिए । घरेलु फुटबलमा विष्ट दाजुभाई एकै क्लब र टोलीमा देखिने गर्दछन् । एपिएफ र मनाङ मस्याङ्दी क्लब लगायतसँगै खेलेका छन् ।

युनिल र मन्जित श्रेष्ठ

युनिल (बायाँ) र मन्जित (दायाँ) राष्ट्रिय टोलीका सहकर्मीसँग

युनिल श्रेष्ठ र मञ्जित श्रेष्ठ दाजुभाईले झण्डै दुई दशक अघिनै नेपाली राष्ट्रिय क्रिकेट टोलीबाटसँगै खेलेका थिए । २००४ मा हङकङविरुद्ध युनिल दाई र मञ्जित भाईले नेपालबाटसँगै खेलेका थिए । एसिसी फास्ट ट्रयाक प्रतियोगिता २००४–०५ अन्तर्गत नेपालले हङकङमा गएर थ्रि डे प्रतियोगिता खेलेका थिए । जसलाई प्रथम श्रेणीको मान्यता दिएको थियो । परेश लोहनीले नेपालको लागि पहिलो कप्तानी गरेका थिए । उक्त खेलको पहिलो इनिङमा युनिल २ रनमा आउट हुँदा दोस्रो इनिङमा २६ रन जोडेका थिए ।

मञ्जित पहिलो इनिङमा ४ र दोस्रोमा शून्यमा आउट भएका थिए । मञ्जितले पहिलो इनिङमा ३ र दोस्रोमा एक विकेट लिएका थिए । उक्त खेलमा हङकङ ३ विकेटले विजयी भएको थियो । अलराउन्डर मन्जितले नेपालको लागि २००२ मै डेब्यू गरेका थिए । युनिल र मञ्जित दुबैले नेपालको लागि यू१९ विश्वकपमा प्रतिनिधित्व गरिसकेका छन् । युनिल पछिल्लो समय अष्ट्रेलियामा बसोबास गर्दै आएका छन् । मञ्जित नेपाल पुलिस क्लबको कप्तानी गर्दै घरेलु क्रिकेट निरन्तर सक्रिय छन् ।

यो पनि पढ्नुहोस : क्रिकेटका पाँच अविश्वसनिय घटनाहरु

फुटबल र क्रिकेट दुवै खेलेका ५ स्टार खेलाडी