तातोपानी (हाम्रो खेलकुद) – एनभिए लिग विजेता होङ्गान्जी न्यु डायमन्ड स्पोर्ट्स क्लबलाई सोझो सेटमा पराजित गर्दै विभागीय नेपाल एपिएफ क्लब भोटेकोशी गाउँपालिका अध्यक्ष कप राष्ट्रिय महिला भलिबल प्रतियोगिताको च्याम्पियन बनेको छ ।

भोटेकोशी गाँउपालिका २ स्थित तातोपानी आधारभुत विद्यालयको खेल मैदानमा शनिबार भएको फाइनलमा एपिएफले डायमन्डलाई ३–० को सोझो सेटमा पराजित गर्दै च्याम्पियन बनेको हो । एपिएफको वर्षको यो पहिलो उपाधि हो ।

एकपक्षीय खेलमा एपिएफले डायमन्डलाई कुनैपनि समय खुलेर खेल्न दिएनन् । एपिएफले पहिलो सेटमा २५–१६ को सहज जित निकालेको थियो । १६–१६ को बराबरीको अवस्थाबाट एपिएफले लगातार ९ अंक जोड्दै पहिलो सेट आफ्नो पक्षमा पारेको थियो । दोस्रो सेटमा एपिएफ सुरुवातमा पछि परेपनि उत्कृष्ट पूनरागमन गर्दै २५–२२ ले जित्न सफल भएको थियो ।

एक समय १०–१४ ले पछि रहेको एपिएफले १७–१७ को बराबरी गर्दै २२–१८ ले अग्रता लिएको थियो । डायमन्डले २२–२२ को बराबरी गरेपनि त्यसपछि एपिएफले लगातार ३ अंक जोडेको थियो । तेस्रो सेटमा सुरुवात देखि नै पकड जमाएको एपिएफले २५–१४ ले जित्दै च्याम्पियन बन्न सफल भयो ।

त्यसअघि तेस्रो स्थानमा लागि भएको खेलमा त्रिभुवन आर्मी क्लबले नेपाल पुलिस क्लबलाई ३–० को सोझो सेटमा पराजित गर्दै आर्मीले तेस्रो स्थान हासिल गरेको हो । रोमाञ्चक र प्रतिस्पर्धात्मक बनेको खेलको पहिलो सेट आर्मीले २६–२४ ले आफ्नो पक्षमा पारेको थियो । दोस्रो सेटमा २५–२१ को सहज जित निकालेको थियो । दोस्रो सेटमा बल लिने क्रममा ल्यान्डिङ नमिल्दा आर्मीका मिडल ब्लकर सुनिता खड्का घाइते भएपछि आर्मी दवावमा आएपनि उक्त दवावलाई झेल्दै सेट आफ्नो पक्षमा पार्न सफल भयो ।

सुनिता घाइते भएर मैदानबाट बाहिरिदा आर्मीले १६–१२ को अग्रतामा खेलिरहेको थियो । आर्मीले तेस्रो सेटमा पछि परेको अवस्थामा उत्कृष्ट पूनरागमन गर्दै २५–२३ को सेटमा जित निकाल्न सफल भएको थियो । ९–१३ ले पछि रहेको अवस्थामा आर्मीले १९–१९ को बराबरीबाट अग्रता लिदै जित हात पार्न सफल भएको थियो । पुलिसविरुद्ध उच्च प्रदर्शन गरेकी आर्मीकी शान्ति थारु प्लेयर अफ दि म्याच घोषित भइन् । उनले २ हजार रुपैयाँ हात पारिन् ।

तेस्रो स्थान हासिल गरेसँगै आर्मीले १ लाख रुपैयाँ हात पारेको छ । चौथो भएको पुलिसले ५० हजार रुपैया पायो ।