काठमाडौं (हाम्रो खेलकुद) – आफुले पाउनुपर्ने रकम नपाएपछि काठमाडौंमै रहेका तीन पाकिस्तानी भलिबल खेलाडी अन्तत बुधबार स्वदेश फर्कने भएका छन् ।

बुलबुले रारा भलिबल क्लबले गत चैत २६ गते सम्पन्न पाँचौ संस्करणको आरबीबी एनभिए क्लब लिग भलिबलको खेल दौरान तीन पाकिस्तानी भलिबल खेलाडीलाई ३ हजार ५ सय अमेरिकी डलरमा अनुबन्ध गरेको बताइएको थियो । तर, प्रतियोगिता सकिएको झन्डै दुई साता पुग्न लाग्दा पाउनुपर्ने रकम नपाएपछि उनीहरु स्वदेश फर्कनन् ।

उनीहरु चैत २८ गते नै स्वदेश फर्कने तय थियो । तर, उनलाई ल्याउन भुमिका खेलेका बुलबुले रारा भलिबलका क्लबका अध्यक्ष तथा प्रशिक्षक निरमकुमार शाहीले समयमा भुक्तानी दिन नसकेपछि पाकिस्तानी खेलाडी स्वदेश फर्कन पाएनन् । उनीहरु ठमेलस्थित एक होटलमा बस्दै आएका छन् ।

पाउने पर्ने रकम नपाएर पाकिस्तानी खेलाडी स्वदेश नफर्केको जानकारी पाएपछि नेपाल भलिबल संघ (एनभिए) ले उनीहरुलाई फर्काउन पहल लिएको छ । अध्यक्ष शाही बेला बेलामा सम्पर्कमा रहेपनि उनीहरुलाई स्वदेश फर्काउन बेवास्ता गरेपछि एनभिएको पहलमा टिपटप हेल्प नेपालले अन्तर्राष्ट्रिय स्तरको खेलाडीलाई छिटो स्वदेश फर्काउन लागेको क्लबका महासचिव अरुण श्रेष्ठले जानकारी दिए ।

एनभिएका र हेल्प नेपालका पदाधिकारीहरु खेलाडी बसेको होटलमा पुगेर उनीहरुसँग समन्वय गर्दा बुलबुलेका अध्यक्ष शाही त्यति बेला थिएनन् । यस्तै बुलबुलेले आफ्ना नेपाली खेलाडीलाई पनि पारिश्रमिक नदिएको पाइएको छ । क्लबले उनीहरुलाई ३० हजार रुपैयामा अनुबन्ध गरेको थियो ।

एनभिएको पहलमा टिपटप हेल्प नेपालले तीन खेलाडीको झन्डै ३ लाख बराबरको टिकट प्रायोजन गरिदिएको क्लबका अध्यक्ष बासु श्रेष्ठले जानकारी दिए । संघ र टिप टपले तत्काललाई उनीहरुलाई स्वदेश फिर्ता पठाउने र त्यसपछि क्लबको गतिविधिमा अघि बढ्ने विषयमा निर्णय गरेका छन् ।

पाकिस्तानी खेलाडीले पनि आउने बेलमा आफै आएको र यहाँ आएपनि सबै दिने भन्ने सहमति भएपनि यहाँ त्यस्तो हुन केही हुन नसकेको बताएका छन् । सम्झौता अनुसार पाकिस्तानी खेलाडीले पाकिस्तानबाट आउदा तीन जनाको ७ हजार ५ सय अमेरिकी डलर, त्यसपछि यहाँ खेल्दाको पारिश्रमिक र फर्कदाको टिकटको मुल्य पाउनुपर्ने थियो । तर बुलबुलु त्यसमा कत्ति पनि भुक्तानी नगरेको पाइएको छ । यस्तै एनभिएले पनि तीन जनालाई १–१ हजार अमेरिकी डलर सहयोग गरेको छ ।

पाँचौ संस्करणको लिगको उपाधि दावेदारको रुपमा रहेको बुलबुले रारा तेस्रो भएको थियो । हेल्प नेपाल पहिलो तथा नेपाल एपिएफ क्लब दोस्रो भएको थियो । लिगको अन्तिम खेलमा हेल्प नेपाल एपिएफसँग ३–० को सोझो सेटमा पराजित भएपछि बुलबुले फाइनल पुग्नबाट बञ्चित बनेको थियो । तेस्रो भएपछि बुलबुले पुरस्कार वितरणमा समारोहमा पनि सहभागी भएको थिएन ।

भलिबल संघका सचिव श्याम श्रेष्ठले खेलाडीलाई रोकेर राख्दा देशकै भलिबलको बदनाम हुने भएकोले संघले समन्वय गरे उनीहरुलाई स्वदेश फर्काउन पहल लिएको बताएका छन् । ‘सोमबार संघको बैठक यहि कारणले बसेका थियौं । अब उनीहरु फर्कने निश्चित भएको छ’, उनले भने, अहिले संघले उनीहरुलाई दिएर पठाउने रकम पछि बुलबुलेका अध्यक्ष शाहीसँग लिने सहमति भएको छ ।’

बुलबुलेका अध्यक्ष शाहीले आफूले समयमा उनीहरुलाई रकम दिन नसकेको स्वीकार गरेका छन् । ‘हामीले सोचे जस्तो लिगमा गर्न सकेनौं । त्यसैले प्रायोजकहरुबाट आउने रकम आएन,’ उनले भने, ‘त्यसैले समयमा खेलाडीलाई पठाउन रकम जोहो गर्न सकिएन । तर म उनीहरुको सम्पर्कमा नियमित छु । मैले नै उनीहरुलाई त्यो होटलमा राखेको हुँ ।’