काठमाडौं (हाम्रो खेलकुद) – नेपालको डीआरएस (द रियल सोल्जर्स) ले पब्जी मोबाइल प्रो लिग (पीएमपीएल) को दक्षिण एसियाली च्याम्पियनसिपको तेस्रो सिजनको उपाधि जितेको छ ।

आइतबार भएको फाइनलमा डीआरएसले पहिलो स्थान हासिल गर्दै १० हजार अमेरिकी डलर प्राप्त गरेको छ । २० टोली सम्मिलित प्रतियोगितामा डीआरएसले मंगोलियाको जिअस ईस्पोर्ट्सलाई पछि पर्दै च्याम्पियन बनेको हो । जिअसले दोस्रो बन्दै ६ हजार ५ सय डलर प्राप्त गर्यो । तेस्रो स्थान नेपालकै ७सी इस्पोर्ट्सले हासिल गर्दै ५ हजार डलर पायो ।

डीआरएस टोलीमा युगेन लामा (माफिया निन्जा), अजय श्रेष्ठ (एजे), निमा तामाङ् (निमा), पेम्बा ग्याल्जेन लामा (ग्याल्जेन), अञ्जन राई (एमआरबोरो) रहेका थिए । डीआरएसले यस जितको श्रेय आफ्नो समर्थकलाई दिँदै निरन्तर साथको अपेक्षा राखेको बताएको छ । टोलीले यसअघि लिग चरणमा ७ हजार ५ सय डलर पुरस्कार प्राप्त गरेको थियो ।

डीआरएसले कुल २सय ७३ अंक जोड्दै शीर्षस्थानमा रहँदा जिअस २ सय ७१ अंकसहित दोस्रो स्थानमा रहयो । अन्तिम खेलअघि दुवै टोलीको २ सय ६१ अंक रहँदा डीआरएसले अन्तिम खेलमा अग्रता जोगाउँदै उपाधि जितेको हो । प्रतियोगिताको शीर्ष ८ मा ४ टोली नेपालका रहेका थिए ।

डीआरएस गत महिना मात्र आधिकारिक रुप दर्ता गर्दै नयाँ व्यवस्थापनमा अघि बढेको थियो । गत संस्करणमा उपविजेता बनेको डीआरएसले यसअघि ग्लोबल च्याम्पियनसिपमा २० औं स्थान हासिल गरेको थियो ।