काठमाडौं (हाम्रो खेलकुद) – नेपाल भलिबल संघ (एनभिए) को कार्यसमितिको निर्वाचनको मिति तय नहुँदै नयाँ अध्यक्षका लागि दुई जना आकंक्षी देखिएका छन् । वर्तमान कार्यसमितिको उपाध्यक्ष निरोज मास्केले यसअघि नै उम्मेदवारी घोषणा गरेकी थिएन् ।

अहिले कार्यसमितिकी सदस्य एवंम पूर्व खेलाडी इन्दिरा निरौलाले पनि अध्यक्षमा उम्मेदवारी दिने घोषणा गरेकी छिन् । २०३३ सालमा गठन भएको भलिबल संघको अध्यक्षमा महिलाहरु आंकाक्षी बनेका पहिलो अवसर हो ।

सघंको आगामी निर्वाचनमा अध्यक्ष मनोरञ्जन रमण शर्मा र महासचिव जितेन्द्रबहादुर चन्दले उम्मेदवारी दिने अवस्था नआएमा अध्यक्ष पदमामा आफूले उम्मेदवारी दिने निरौलाले जनाएकी छिन् । राष्ट्रिय खेलकुद परिषद् (राखेप) मा दोस्रो कार्यकाल सदस्य रहेकी निरौलाले नयाँ वर्षसँगै नयाँ जोसका साथ आफूले उम्मेदवारी दिने सामाजिक सन्जाल फेसबुकमार्फत सार्वजनिक गरेकी छिन् ।

फेसबुकमा उनले लेखेकी छन्, ‘ मनोरञ्जन रमण शर्माको अभिभावकत्व र महासचिव जितेन्द्र बहादुर चन्द जसले भलिबल खेलको लागि आफ्ना व्यक्तिगत इच्छा आकांक्षालाई थाती राखेर विगत आठ वर्षदेखि भलिबल खेललाई यस उचाईमा पु¥याउनका लागि आफ्नो बुद्धि विवेकको सदुपयोग गर्दै सुतेको भलिबललाई हामी सबै भलिबल खेलसँग आबद्ध व्यक्तिहरूको साथ र सहयोग लिई यहाँ सम्म ल्याई पुर्याउन सफल भएका छौं ।’

उनले अगाडि भनेकी छिन, हामीले थोरै गरेका छौं । धेरै गर्न बाँकी छ, आगामी नेतृत्व कसले लिने भन्ने भन्दा पनि भलिबल खेल विकासका लागि को पात्र उपयुक्त हुन्छ भन्ने कुराले महत्व राख्छ र यो कुरालाई सबैले सोच्नु पर्ने आजको आवश्यकता पनि हो त्यसैले यदि शर्मा र चन्द ले भलिबल संघमा उम्मेदवारी दिने अवस्था नभएमा वा गर्न नदिएको खण्डमा उपयुक्त पात्र आउन नसक्ने अवस्था सृजना हुन सक्ने अवस्थालाई ध्यानमा राखी मैले भलिबल खेललाई बचाइ राख्नका निम्ति पनि साल २०७८ को सुरुवातमा मैले धेरै कुरा मनन गरेर नेपाल भलिबल संघको अध्यक्ष पदको उमेदवारी घोषणा गर्ने निर्णय गरेको छु ।

‘नया बर्षसँगै नयाँ नेतृत्वले पनि भलिबल खेलको भविष्य निर्धारण गर्ने भएकोले पनि यो वर्ष भलिबल खेलप्रेमी का लागि निकै महत्व राख्ने भएकोले, संघ बलियो भएमात्रै संघमा रहने मान्छेहरू स्वच्छ, इमान्दार, भलिबल खेल बुझेका तथा सहयोगी मनका पदाधिकारी साथीहरुको आगमन भएमात्रै नेपाली भलिबलले थप उचाइ प्राप्त गर्न सक्नेछ ’ उनले भनेकी छन् ।

४ वर्षअघि कार्यसमितिले निरौलालाई भलिबल संघको सदस्यमा मनोनयन गरेको थियो । उपाध्यक्ष मास्केले पनि वर्तमान अध्यक्ष शर्माले निरन्तरता दिन चाहेको अवस्थाबाहेकमा आफूले उम्मेदवारी दिने गत वर्ष जनाएकी थिइन् ।

२०७७ मा नयाँ ऐन आएसँगै संघहरु प्रादेशिक जानेमा कार्यविधि तयार भइरहेपनि त्यसले पुर्णता नपाउदा राखेपमा दर्ता संघहरुको निर्वाचन हुन सकेको छैन । भलिबल संघको गतवर्ष असार पहिलो साता नै निर्वाचन सम्पन्न भइसक्नुपर्ने थियो । तर, कार्यविधि तयार नभएकाले भलिबलसहित धेरै संघको निर्वाचन हुन सकेको छैन ।