काठमाडौं (हाम्रो खेलकुद) – स्थानीय प्रो शुक्र बहादुर राईले धरान ओपन गल्फ प्रतियोगिताको उपाधि जितेका छन् । अन्तिम दिन १ अन्डर ६९ स्कोरसहित समग्रमा ४ अन्डर २ सय ६ स्कोर जोडेका शुक्रले उपाधिसहित ९० हजार रुपैयाँ प्राप्त गरे ।

सूर्य नेपाल गल्फ टुर २०२१ सिजनको दोस्रो इभेन्टमा शुक्रले अन्तिम दिन उत्कृष्ट प्रदर्शन गर्दै अघिल्लो दिन उपाधि दावेदारीमा रहेका भुवन नगरकोटीमाथि ७ स्ट्रोकको जित हासिल गरेका हुन् । अघिल्लो दिन अग्रतामा रहेका भुवनले बिर्सनलायक प्रदर्शन गर्दै ७ ओभर ७७ स्कोर जोडेपछि उनी दोस्रो स्थानमा सिमित रहे । उनीसँगै बलभद्र राई र कृष्णमान राजवाहकले पनि संयुक्त दोस्रो स्थानमा रहँदै जनही ४३ हजार ६ सय ६६ रुपैयाँ प्राप्त गरे । कृष्णमानले अन्तिम दिन ३ अन्डर ६७ तथा बलभद्र राईले १ ओभर ७१ स्कोर जोडे ।

रामे मगर र निरज तामाङले ४ अन्डर २ सय १४ स्कोरसहित संयुक्त पाँचौ स्थान हासिल गरे । दुवैले २८ हजार ५ सय प्राप्त गरे । दीपक आचार्यले ५ ओभर २ सय १५ स्कोरसहित सातौं स्थान हासील गर्दै २५ हजार रुपैयाँ प्राप्त गरे । रवी खड्का र संजय लामाले आठौँ हुँदै २२ हजार प्राप्त गर्दा दीनेश प्रजापतिले १० औं स्थानमा रहँदै १९ हजार रुपैयाँ पाए ।

युवराज भुजेलले ९ ओभर २ सय १९ स्कोर जोड्दै एमेच्योर उपाधि जिते । रितेश तामाङ १४ ओभर २ सय २४ स्कोरसहित उपविजेता बने । प्रतियोगितामा ३९ व्यावसायिक र १३ एमेच्योर खेलाडीले सहभागिता जनाएका थिए । धरानस्थित पार-७० को निर्भाना कन्ट्री क्लब हेल्थ एण्ड गल्फ रिसोर्टमा भएको प्रतियोगिता नेपाल प्रोफेसनल गल्फर संघ तथा धरान गल्फ क्लबको आयोजनामा भएको हो । प्रतियोगिताको मुख्य प्रायोजक धरान उपमहानगरपालिका तथा सहयोगी आरसी कोला, म्याजिक फुटवेयर र हिमालयन रिजर्भ रहेका थिए ।