काठमाडौं (हाम्रो खेलकुद) – देशव्यापी अन्तर वडा टेबल टेनिस प्रतियोगितालाई गंगादेशवी बस्त्रालयले सह–प्रायोजन गरेको छ । स्पिन इभेन्टरस प्रा ली. को आयोजनामा लैनचौर स्थित राष्ट्रिय टेबल टेनिस प्रशिक्षण केन्द्रमा देशव्यापी अन्तर वडा टेबल टेनिस सोमबारदेखि शनिबारसम्म सञ्चालन हुनेछ ।

गंगादेवी बस्त्रालयले प्रतियोगिता खर्चको कुल ३० प्रतिशत बजेट ५ लाख ५० हजार रुपैयाँ आयोजकलाई प्रदान गर्ने बताइएको छ । आइतबार पत्रकार सम्मेलनमा आयोजक स्पिन इभेन्टरस प्रा ली. र गंगादेवी बस्त्रालयबीच सम्झौता भएको छ । अखिल नेपाल टेबल टेनिस संघको प्राविधिक सहयोग रहने प्रतियोगितालाई भ्याली कन्स्ट्रक्सन प्रा.लीले मुख्य प्रायोजन गरेको छ ।

प्रतियोगिताको सह –प्रायोजकमा गंगादेवी बस्त्रालयसँगै समाजसेवी पूर्ण शंकर श्रेष्ठ, सम्झना ल्याबोरेटोरी क्लिनिक प्रा.लि, बाबुरत्न कन्स्ट्रक्सन प्रा.लि. र मेटल सेपर छन् । अफिसियल बलको रुपमा डि.एच.एस. स्पोट्स नेपाल रहेको छ । प्रतियोगिताको प्रत्यक्ष प्रसारण (लाइभ) हाम्रो खेलकुद डट कमले गर्ने छ ।

प्रतियोगितामा देशभरका वडाहरुबाट पुरुषमा २६ टिम सहित ४ सय ३३ र महिलामा ८ टिम सहित ९० जना खेलाडीले प्रतिस्पर्धा गर्ने बताइएको छ । प्रतियोगितामा महिला पुरुष टिम, महिला पुरुष एकल, भेट्रान सिंगल्स (४० वर्षमाथि) र पुरुष भेट्रान्स एकल (५५ वर्षमाथि) गरेर ६ विधामा प्रतिस्पर्धा हुने बताइएको छ । टेवल टेनिसका वर्तमान वरियताका शीर्ष १६ मा महिला र पुरुष खेलाडीले भने प्रतियोगितामा भाग लिन पाउने छैनन् ।
प्रतियोगितामा १९ लाख ५० हजार रुपैयाँ खर्च हुने अनुमान गरिएको छ । पुरुष र महिला सिंगल्सका विजेताले ३० हजार रुपैयाँ प्राप्त गर्नेछन् । दोस्रो हुनेले १५ हजार र तेस्रो हुनेले ७ हजार ५ सय रुपैयाँ पाउने छन् । त्यस्तै भेट्रान्स एकलतर्फ प्रथम हुनेले १० हजार, दोस्रो हुनेले ५ हजार र तेस्रोले २ हजार ५ सय रुपैयाँ पाउने छन् । पदक तालिका अनुसार शीर्ष स्थान हासिल गर्न सफल वडाले ५० हजार रुपैयाँ प्राप्त गर्नेछन् ।