नेपालगन्ज (हाम्रो खेलकुद) – सातौं संस्करणको प्रधानमन्त्री कप महिला भलिबल प्रतियोगितामा नेपाल एपिएफ क्लबले लगातार तेस्रो जित निकाल्दै उपाधि नजिक पुगेको छ ।

बाँके जिल्ला भलिबल संघको आयोजनामा जारी प्रतियोगिता अन्तर्गत सोमबार नेपालगन्जस्थित रंगशाल कर्भहलमा भएको खेलमा एपिएफले होंगान्जी न्यु डायमन्डलाई ३-१ को सेटमा पराजित गर्दै लगातार तेस्रो जित निकालेको हो ।

पहिलो सेटमा पराजित भएपनि एपिएफले त्यसपछि उत्कृष्ट प्रर्दशनका साथ लगातार तीन सेट जित्दै उपाधि सम्भावना बलियो बनाएको छ । एपिएफले होंगान्जी न्यु डायमन्डलाई २३-२५, २५-१३, २५-१७ र २५-२२ ले पराजित गर्यो ।

पहिलो खेलमा एपिएफले त्रिभुवन आर्मी क्लबलाई ३-१ र दोस्रो खेलमा लुम्बिनी युनाइटेड टिममाथि ३-० को सोझो सेटमा पराजित गरेको थियो । पहिलो खेलमा पुलिससँग ३–२ को सेटमा पराजित भएको डायमन्डले दोस्रो खेलमा त्रिभुवन आर्मी क्लबलाई ३–१ को सेटमा पराजित गरेको थियो ।

एपिएफको ३ खेलमा ९ अंक छ भने पुलिस २ खेलमा ५ अंकसहित दोस्रो स्थानमा छ । न्यु डायमन्डको ३ खेलमा ४ अंक छ । आर्मी ३ अंक र लुम्बिनी अंकविहिन छ ।

लिगमा तीन विभागिय टोली नेपाल पुलिस क्लब, नेपाल एपिएफ क्लब, त्रिभुवन आर्मी क्लब, होङ्गान्जी न्यु डायमण्ड स्पोर्ट्स क्लब र स्थानिय टोली लुम्बिनी युनाइटेड गरी ५ टोलीको सहभागिता रहेको छ । लिगपछि बढी अंक जोड्ने टोलीले उपाधि जित्नेछ । लिगको विजेताले उपाधिसहित ५ लाख रुपैयाँ प्राप्त गर्नेछ । त्यस्तै दोस्रो टोलीलाई २ लाख, तेस्रोलाई १ लाख र चौथो हुने टोलीलाई ५० हजार रुपैयाँ प्रदान गरिनेछ ।