नेपालगन्ज (हाम्रो खेलकुद) – सातौ संस्करणको प्रधानमन्त्री कप महिला भलिबल प्रतियोगिता दोस्रो खेलमा त्रिभुवन आर्मी क्लबले स्थानिय टोली लुम्विनी युनाइटेड टिममाथि सहज जित निकाल्दै विजयी सुरुवात गरेको छ ।

बाँके जिल्ला भलिबल संघको आयोजनामा भएको प्रतियोगितामा आर्मीले स्थानिय टोली लुम्विनी युनाइटेड टिममाथि ३–० को एकपक्षीय जित निकाल्यो । आर्मीले लुम्बिनीमाथि २५–८, २५–८ र २५–७ को सहज जित निकालेको थियो । यो जितसँगै आर्मीको ३ अंक पुगेको छ । आर्मीकी साफिया पुन प्लेयर अफ दि म्याच चुनिइन् ।

त्यसअघि पहिलो खेलमा नेपाल पुलिस क्लबले होङ्गान्जी न्यु डायमन्ड स्पोर्ट्स क्लबलाई ३-२ को सेट अन्तरले हराउँदै विजयी सुरुवात गरेको थियो । लिगमा तीन विभागिय टोली नेपाल पुलिस क्लब, नेपाल एपिएफ क्लब, त्रिभुवन आर्मी क्लब, होङ्गान्जी न्यु डायमण्ड स्पोर्ट्स क्लब र स्थानिय टोली लुम्बिनी युनाइटेड गरी ५ टोलीको सहभागिता रहेको छ ।

लिगपछि बढी अंक जोड्ने टोलीले उपाधि जित्नेछ । लिगको विजेताले उपाधिसहित ५ लाख रुपैयाँ प्राप्त गर्नेछ । त्यस्तै दोस्रो टोलीलाई २ लाख, तेस्रोलाई १ लाख र चौथो हुने टोलीलाई ५० हजार रुपैयाँ प्रदान गरिनेछ । लिगमा शनिबार दुई खेल हुनेछ ।

दिउँसो १ बजे त्रिभुवन आर्मी क्लब र नेपाल एपिएफ क्लब तथा दोस्रो खेलमा नेपाल पुलिस क्लब लुम्बिनी युनाइटेड टिमबीच ३ बजे प्रतिस्पर्धा हुनेछ ।