नेपालगन्ज (हाम्रो खेलकुद) – नेपाल पुलिस क्लबले सातौ संस्करणको प्रधानमन्त्री कप महिला भलिबल प्रतियोगिताको उद्घाटन खेलमा होङ्गान्जी न्यु डायमन्ड स्पोर्ट्स क्लबलाई हराउँदै विजयी सुरुवात गरेको छ ।

शुक्रबार नेपालगन्जस्थित रंगशालाको कर्भहलमा भएको खेलमा पुलिसले न्यु डायमन्डलाई ३-२ को सेटले पराजित गर्दै विजयी सुरुवात गरेको हो ।

पुलिस पहिलो, तेस्रो र पाँचौ सेटमा विजयी भएको थियो । पहिलो सेटमा पुलिस २५–१९ ले विजयी भएको थियो । दोस्रो सेटमा उच्च प्रतिस्पर्धात्मक भएको थियो । रोमान्चक बनेको दोस्रो सेटमा कप्तान ललिता नाथले अन्तिम समयमा लगातार दुई अंक जोड्दै न्यु डायमन्डलाई २८–२६ को जित दिलाएकी थिइन् ।

तेस्रो सेटमा पुलिसले सुरुवाती ६ अंकको अग्रता लिदैं ९–३ को अवस्थामा थियो । न्यू डायमन्डले राम्रो पूनरागमन गर्दै १३–१३ को बराबरी अवस्थामा पुर्याएको थियो । तर १९–१९ को अवस्थाबाट पुलिसले लगातार ६ अंक जोड्दै २५–१९ को जित निकाल्न सफल भयो ।

चौथो सेट न्यू डायमन्डले २५–१७ ले सहजै जित्दै पाँचौं सेटमा पुर्याएको थियो । प्रतिभा मालीको प्रर्दशन उच्च थियो । निर्णाय पाँचौं सेट पुलिसले १५–८ ले जित्यो ।

प्रतियोगितामा तीन विभागिय टोली नेपाल पुलिस क्लब, नेपाल एपिएफ क्लब, त्रिभुवन आर्मी क्लब, होङ्गान्जी न्यु डायमण्ड स्पोर्ट्स क्लब र स्थानिय टोली लुम्बिनी युनाइटेडको सहभागिता रहेको छ । विजेताले उपाधिसहित ५ लाख रुपैयाँ प्राप्त गर्नेछ । त्यस्तै दोस्रो टोलीलाई २ लाख, तेस्रोलाई १ लाख र चौथो हुने टोलीलाई ५० हजार रुपैयाँ प्रदान गरिनेछ ।