बाँके (हाम्रो खेलकुद) – बाँके जिल्ला भलिबल संघको आयोजनामा सगरमाथा सिमेन्ट सातौं प्रधानमन्त्री आमन्त्रण महिला भलिबल प्रतियोगिता सम्पूर्ण तयारी पूरा भएको छ ।

फागुन २१ देखि २५ गते सम्म नेपालगन्ज रंगशालाको कभर्ड हलमा सञ्चालन हुने प्रतियोगिता सम्पूर्ण तयारी पूरा भएको आयोजक बाँके भलिबल संघले जनाएको छ । प्रतियोगितामा
विभागिय टोली नेपाल पुलिस क्लब, त्रिभुवन आर्मी क्लब, नेपाल एपिएफ क्लब, होगांजी न्यू डायमण्ड र स्थानिय टोली लुम्बिनी युनाइटेडबीच प्रतिस्पर्धा हुने छ ।

दक्षिण एसियामा नम्बर एक क्लब च्याम्पियनसिपका रुपमा प्रधानमन्त्री कपलाई स्थापना गर्ने उद्देश्यका साथ व्यवस्थापनलाई विशेष ध्यान दिने तयारी गरेको संघका अध्यक्ष टीएस ठकुरीले बताए ।

यसपटक पुरस्कार राशीमा बृद्धि भएको छ । विजेताले उपाधिसहित ५ लाख रुपैयाँ प्राप्त गर्नेछ । त्यस्तै दोस्रो टोलीलाई २ लाख, तेस्रोलाई १ लाख र चौथो हुने टोलीलाई ५० हजार रुपैयाँ प्रदान गरिनेछ । गत वर्ष विजेताले २ लाख रुपैयाँ प्राप्त गरेको थियो ।

यसपटक प्रधानमन्त्री कपलाई सगरमाथा सिम्नेट तथा राष्ट्रिय बाणिज्य बैंकले सहयोग गरेको छ । २०७० सालमा सुरु गरेको प्रधानमन्त्री कपको पहिलो संस्करण नेपाल पुलिस क्लब, दोस्रो नेपाल एपीएफ, तेस्रो र चौथोमा रेलवे इन्डिया, पाँचौमा एपीएफ, छैटौंमा पुलिसले जितेको थियो । पाँचौं संस्करणमा बंगलादेशी क्लबको सहभागिता थियो ।