पोखरा (हाम्रो खेलकुद) – प्रथम टाइगर कप आमन्त्रण राष्ट्रिय क्लब भलिबल च्याम्पियनसिप २०७७ अन्तर्गत पहिलो दिनको खेलमा नेपाल पुलिस क्लबको महिला टोलीले नेपाल एपिएफ क्लबलाई पराजित गरेको छ ।

दिनको पहिलो खेलमा पुलिसले एपिएफमाथि सोझो सेटको जित हासिल गरेको हो । पहिलो सेट निकै प्रतिस्पर्धात्मक रहँदा पुलिसले २६-२४ को जित हासिल गरेको थियो । दोस्रो सेटमा पुलिसले २५-२२ को जित हासिल गर्दा तेस्रो सेटमा एकतर्फी प्रदर्शन गर्दै २५-११ को जित दर्ता गर्यो ।

दोस्रो खेलमा होंगान्जी न्यु डायमण्डले त्रिभुवन आर्मी क्लबलाई ३-२ ले पराजित गर्यो । पहिलो सेटमा २५-१२ को सहज जित दर्ता गरेको न्यु डायमण्डले त्यसपछि भने दुई सेट गुमायो । आर्मीले २५-२२ र २५-१८ को जित दर्ता गरेको थियो । चौथो सेटमा आर्मीले अन्त्यतिर लय गुमाउँदा खेल पाँचौ सेटमा लम्बिएको थियो । आर्मी २७-२५ ले सेट गुमाउन पुग्यो । पाँचौ सेटमा न्यु डायमण्ड १५-१३ ले जित हासिल गर्दै विजयी सुरुवात गर्यो ।

महिलातर्फ खेलपछि उद्घाटन समारोह समेत भएको थियो । गण्डकी प्रदेशका मुख्यमन्त्री पृथ्वी सुब्बा गुरुङ, नेपाल भलिबल संघका अध्यक्ष मनोरन्जन रमण शर्मा, टाइगर ग्रुपका अध्यक्ष नारायण शर्मा लगायतको उपस्थिति रहेको थियो ।

दिनको अन्तिम खेलमा नेपाल पुलिस क्लबले स्थानीय टोली गण्डकी प्रदेशलाई ३-० को सोझो सेटमा पराजित गर्यो । पुलिसले पहिलो सेटमा निकै परिश्रम गर्नुपरे पनि २७-२५ ले जित हासिल गर्यो । दोस्रो सेटमा २५-२१ तथा तेस्रो सेट २५-२२ ले जित्दै पुलिसले विजयी सुरुवात गरेको हो ।

प्रतियोगिता अन्तर्गत बुधबार पुरुषतर्फ १०:३० बजे गण्डकी र आर्मी तथा १२:३० बजे नेपाल पुलिस र नेपाल एपीएफ क्लब भिड्नेछन् । महिलातर्फ एकमात्र खेल नेपाल पुलिस क्लब र त्रिभुवन आर्मी क्लबबीच हुनेछ ।