काठमाडौं (हाम्रो खेलकुद) – नेपाली महिला भलिबल जगतमा छुट्टै पहिचान बनाउन सफल न्यु डायमन्ड स्पोर्ट्स क्लबलाई अर्थोप्लास्ट रिह्याबिलिटेसन सेन्टरले फिटनेस सामाग्री सहयोग गरेको छ ‌।

शनिबार एक कार्यक्रमबीच अर्थोप्लास्टका प्रबन्ध निर्देशक हरिकुमार तामाङ र कार्यकारी निर्देशक पशुपति रेग्मीले न्यु डायमन्डकी खेलाडी प्रतिभा माली र अध्यक्ष सुनकेशरी मालीलाई सामाग्री हस्तान्तरण गरे । अर्थोप्लास्टले क्लबलाई १५ हजार रुपैयाँ बराबरको सामाग्री निशुल्क उपलब्ध गराएको हो ।

यसअघि अर्थोप्लास्टको टोलीले न्यु डायमन्डको प्रशिक्षण स्थलमा गएर खेलाडीसँग अन्तर्क्रिया समेत गरेका थिए । स्वास्थ्य निर्देशक सुरज भुषालले खेलाडीलाई फिटनेसको महत्त्वबारे बुझाउन यो कदम चालिएको बताए ।

‘हामीले खेलकुदलाई लामो समयदेखि प्राथमिकतामा राख्दै आएका छौं । हामी चोट लागेपछि ठिक पार्ने नभएर चोट लाग्नै नदिनेबारे जनचेतना फैलाउन चाहन्छौं । खेलाडीको जीवनमा फिटनेस अभिन्न पाटो हो । क्लबका लागि यो सानो सहयोगले खेलाडीहरुलाई फाइदा हुने विश्वास लिएका छौं,’ उनले भने ।

अर्थोप्लास्टले खेलकुदलाई लक्षित गर्दै आफ्नो केन्द्रमा छुट्टै विभाग निर्माण गरेको छ । घुँडाको शल्यक्रियापछि प्रतिभा लगायत बास्केटबलकी सविता खड्का, फुटबलका रुपेश तामाङ, रविन श्रेष्ठ लगायतले पनि यहि फिजियोथेरापी गरेका थिए । अर्थोप्लास्टले केहि महिनाअघि किरण चेम्जोङलाई ब्रान्ड एम्बेसडर नियुक्त गरेको थियो ।