काठमाडौं (हाम्रो खेलकुद)– राष्ट्रिय महिला भलिबल टोलीकी सदस्य कमला पुन अर्को साता विवाह बन्धनमा बाधिने भएकी छन् । म्याग्दीको मालिका गाँउपालिका ३ औलकी कमला र सोही गाँउपालिका २ बेलीका राम रोक्काबीच बुधबारका लागि विवाह तय भएको छ ।

मगर परम्परा अनुसार विवाह हुने कमलाले जानकारी दिइन् । उनी मंसिर ७ गतेबाटै रामको घर बस्न गएकी थिइन् । ‘अब बुधबार यहाँ हाम्रो मगर परम्परा अनुसार विवाह हुन्छ , उनले भनिन्, ‘त्यसपछि त्यसै साँझ माइती घर जाने छौं ।’

झन्डै ५ वर्षयताको प्रेम सम्बन्धलाई परिवारको सहमतिमा विवाह बन्धनमा परिणत गर्न लागेको कमलाले बताइन् । कामलाका अनुसार अहिले जापान बस्दै आएका राम केहि वर्षअघि मकाउ बस्थे । राम जापानबाट फर्केपछि कमलासँगै मंसिर ७ मा आफ्नो घर पुगेका थिए । एउटै गाँउ भएपनि उनीबीच सामान्य चिनजान रहेको र पछि सामाजिक सञ्जाल फेसबुकमार्फत सम्बन्ध प्रगाढ बन्दै गएको कमलाले सुनाइन् ।

६ वर्षभन्दा लामो समयदेखि राष्ट्रिय टोलीकी सदस्य रहँदै आएकी कमला नेपाली महिला टोलीले गत वर्ष दुई ठूला सफलता हासिल गर्दा त्यसको सदस्य थिइन् । महिला टोलीले बंगलादेशमा एभिसी सेन्ट्रल जोनमा स्वर्ण पदक जितेको थियो ।

त्यस्तै मंसिरमा स्वदेशमा भएको १३ औं दक्षिण एसियाली खेलकुद (साग) मा रजत पदक जितेको थियो । त्यो महिला भलिबल टोलीको अहिले सम्मकै ठूलो सफलता हो । सन् २०१६ को १२ औं सागमा कास्य पदक जित्दा पनि कमला टोलीको सदस्य थिइन् ।

उनी नेपाल पुलिस क्लबबाट व्यवासयिक भलिबल खेल्दै आएकी छिन् । ८ वर्षदेखि पुलिसमा रहेकी २७ वर्षे कमलाले सक्दा सम्म भलिबलमै सक्रिय रहने बताइन् । घर परिवार र रामबाट पनि साथ रहेकोले तत्काल भलिबलबाट अलग नहुने उनले जनाइन् ।

गत वर्ष जेठमा दायाँ घुँडाको शल्यक्रियापछि कमला राष्ट्रिय टोलीमा फर्कन सफल भएकी थिइन् । गत वर्ष फागुनमा पुलिसले नेपालगन्जमा छैटौं प्रधानमन्त्री कप भलिबल प्रतियोगिता जित्दा कमला टोलीकी महत्वपूर्ण सदस्य थिइन् । त्यसयता कोरोनाका कारण कुनै पनि भलिबल प्रतियोगिता हुन सकेको छैन ।