काठमाडौं (हाम्रो खेलकुद)– लक्ष्मी नारायण स्मृति मेमोरियल ट्रष्टले राष्ट्रिय भलिबल र बीच भलिबल महिला पुरुष टोलीका खेलाडीको कोभिड १९ विमा गरिदिने भएको छ ।

ट्रष्टकी अध्यक्ष अन्जु श्रेष्ठले शुक्रबार विज्ञप्ती जारी गर्दैै गत वर्ष स्वदेशमा आयोजना भएको १३ औं दक्षिण एसियाली खेलकुद (साग) मा सहभागी टोलीका खेलाडीको विमा गरिदिने जानकारी दिएकी छिन् । भलिबल टोलीको महिला र पुरुषमा समान १४ तथा बीच भलिबल टोलीको महिला र पुरुष टोलीमा समान ४ गरि कुल ३६ खेलाडीको विमा गर्ने प्रतिष्ठानले जनाएको छ ।

१३ औं सागमा महिला भलिबल टोलीले रजत र महिला बीच टोलीले कास्य पदक जितेको थियो । पुरुषतर्फ भने नेपाल पदक विहिन बनेको थियो । महिला टोलीले सागमा अहिले सम्मकै ठूलो सफलता हात पार्ने क्रममा रजत पदक जितेको थियो ।

त्यसअघिका भाग लिएका तीनै संस्करणमा कास्य पदकमा सिमित भएको महिला भलिबल टोलीले यसपटक घरलु कोर्टमा एतिहासिक सफलता प्राप्त गरेको थियो । बीच भलिबल भने सागमा पहिलो पटक समावेश गरिदा त्यसमा पनि महिला टोली कास्य पदक जित्न सफल भएको थियो ।

सागका अघिल्ला दुई संस्करणमा कास्य जित्दाकी कप्तान समेत रहेकी अन्जु श्रेष्ठको पिता लक्ष्मी नारायण स्मृतिमा स्थापित ट्रष्टले अहिले खेलाडीको विमा गर्न लागेको हो । कोभिड १९ का कारण अन्य क्षेत्र जस्तै खेलाडी प्रभावित भएकोले उनीहरुको मनोबल उच्च राख्नका लागि विमा गर्न लागिएको बताइएको छ ।

अन्जुले यसै महिना भएको राष्ट्रिय खेलकुद परिषद् (राखेप)को सदस्य सचिवका लागि समेत प्रतिस्पर्धा गरेकी थिइन् । २७ जनाको आवेदनबाट ३ जना सिफारिस हुँदा अन्जु पनि त्यसमा पर्न सफल भएकी थिइन् । सरकारले सदस्य सचिवमा भने रमेशकुमार सिलवाललाई नियुक्त गरेको थियो ।

स्वर्गिय श्रेष्ठ नेपालको प्रथम अन्तर्राष्ट्रिय रेफ्री थिए । जापानबाट भलिबल प्रशिक्षण कोर्ष गरेका श्रेष्ठ जावलाखेल भलिबल प्रशिक्षण केन्द्रका संस्थापक उपाध्याक्ष र प्रशिक्षक थिए । उनको नाममा स्थापित ट्रष्टले २०६० सालदेखि हरेक वर्ष उत्कृष्ट महिला र पुरुष खेलाडीलाई समान १० हजार रुपैयाँबाट सम्मान गर्दै आएको छ ।