काठमाडौं (हाम्रो खेलकुद)— भलिबल खेलाडी प्रतिभा मालीलाई राष्ट्रिय खेलाडी कल्याणकारी कोषमार्फत आर्थिक सहयोग गरिएको छ । राष्ट्रिय खेलकुद परिषद् (राखेप) अन्तर्गत रहेको कोषले ब्याज रकमबाट खेलाडीलाई सहयोग गर्दै आएको छ ।

कोषले गतवर्ष चोट लागेपछि शल्यक्रिया गराएर हाल फिजियोथेरापी गराइरहेकी प्रतिभालाई २ लाख रुपैयाँ सहयोग गरेको हो । राष्ट्रिय तथा अन्तर्राष्ट्रय खेलाडी संघका अध्यक्ष दीपक श्रेष्ठले प्रतिभाले फिजियो गराउने ग्वार्कोस्थित अर्थोप्लास्ट रिह्याबलिटेसन सेन्टर पुगेर चेक हस्तान्तरण गरेका थिए । होंगान्जी न्यु डायमण्डकी स्पाइकर प्रतिभाले नेपाललाई एभीसी सेन्ट्रल जोनको उपाधि र १३ औं सागमा रजत पदक जिताउन महत्त्वपूर्ण भूमिका निर्वाह गरेकी थिइन् ।

गत माघमा एनभिए कप क्लब च्याम्पियनसिपमा एपिएफविरुद्ध फाइनल खेल्ने क्रममा प्रतिभाको बायाँ घुँडामा चोट लागेको थियो । त्रिपुरेश्वरस्थित ब्लुक्रसमा उनको घुँडाको शल्यक्रिया गरिएको थियो । त्यसको केहि समयपछिबाट उनले अर्थोप्लास्टमा फिजियो गराउँदै आएकी छिन् ।

रकम हस्तान्तरमा खेलाडी संघका निर्वतमान अध्यक्ष दीपक विष्ट, संघका महासचिव शिवसुन्दर गोथे, १३ औं दक्षिण एसियाली खेलकुदकी दाहोरो स्वर्ण पदक विजेता आयशा शाक्यको उपस्थिति थियो । प्रतिभाको उपचारका लागि राखेपले यसअघि नै ५ लाख रुपैयाँ भन्दा बढी उपलब्ध गराएको थियो ।

त्यस्तै भलिबल संघका पदाधिकारीले पनि व्यक्तिगत रुपमा सहयोग गरेका थिए । उपचार खर्च नपुगेका कारण प्रतिभाले कल्याणकारी कोषमा दिएको निवेदनका आधारमा सहयोग गरिएको कोषका सदस्य सचिव समेत रहेको खेलाडी संघका अध्यक्ष श्रेष्ठले बताए । खेलकुद विकास ऐन लागु हुनुअघि नै कोषको बैठकले प्रतिभालाई सहयोग गर्ने निर्णय गरे अनुरुप रकम हस्तान्तरण गरिएको श्रेष्ठले जानकारी दिए ।

कोषको अध्यक्ष राखेप सदस्य सचिव रहने व्यवस्था छ । कोषबाट यसअघि पनि खेलाडीहरुलाई विभिन्न शीर्षकमा सहयोग हुँदै आएको छ । २०७२ सालको वैशाख १२ र २९ गते गएको विनाशकारी भूकम्पमा प्रभावित हुने खेलाडी र खेलाडीका परिवारलाई पनि कोषमार्फत सहयोग भएको थियो ।