काठमाडौं (हाम्रो खेलकुद) – आयोजक न्युटन पब्लिक स्कुल ‘बी’ का मानबहादुर श्रेष्ठ र दिल सुनारको जोडी प्रथम न्युटन–बाग्लुङ कप टु ‘ए’ साइड पुरुष खुला भलिबल प्रतियोगिताको च्याम्पियन बनेको छ ।

१३औं दक्षिण एसियाली खेलकुद (साग) को बिच भलिबलको समेत जोडी रहेको मानबहादुर र दिल सुनारको जोडी गण्डकी प्रदेशका सन्जुविक्रम शाह र होम पुनको जोडीलाई पराजित गर्दै च्याम्पियन बनेको हो । काठमाडौंस्थित न्युटन पब्लिक स्कुलको कोर्टमा शनिबार भएको निकै नै प्रतिस्पर्धात्मक फाइनलमा न्युटन ‘बी’ ले गण्डकी प्रदेशमाथि ३–२ को प्रतिस्पर्धात्मक जित निकाल्दै उपाधि जित्न सफल भएको हो ।

प्रतिस्पर्धात्मक खेलको पहिलो सेट गण्डकीले २५–१८ ले आफ्नो पक्षमा पारेको थियो । दोस्रो सेट न्युटन ‘बी’ ले २५–१९ ले आफ्नो पक्षमा पार्दै खेललाई १–१ सेटको बराबरीमा ल्यायो । तेस्रो सेटमा गण्डकी पुनः २५–१९ ले विजयी भयो । चौथो सेटमा न्युटनले २५–२१ ले खेल आफ्नो सेटमा पारेपछि खेल पाँचौ सेटमा लम्बिएको थियो । निर्णायक सेटमा न्युटले एकपक्षीय प्रदर्शन गर्दै १५–५ ले खेल आफ्नो पक्षमा पार्न सफल भयो । उपाधिसँगै न्युटन ‘बी’ ले ७० हजार ७ सय ७७ रुपैयाँ हात पार्यो । दोस्रो भएको गण्डकीले ४० हजार ४ सय ४४ रुपैयाँमा चित्त बुझायो ।

शनिबारै एपीएफका विजय थापा र राजकुमार निरौलाको जोडीले ढोरपाटनका मनवीर छन्त्याल र सोवित रानाको जोडीलाई २५–१९ र २५–२२ को सोझो सेटमा पराजित गर्दै तेस्रो स्थान हात पारे ।  तेस्रो भएको एपिएफले २० हजार २ सय २२ रुपैया प्राप्त गर्यो ।

न्युटन ‘ए’ का दिल सुनार प्रतियोगिताको सर्वाेत्कृष्ट खेलाडी घोषित भए । उनले ३ हजार ५ सय रुपैयाँ हात पारे । विजयी टोली तथा खेलाडीहरुलाई बाग्मती प्रदेश प्याब्सनका अध्यक्ष थकिन कुमार गुरुङ र विद्यालयका प्रिन्सिपल राम केसीले पुरस्कृत गरे ।

दुई दिने प्रतियोगितामा १६ टोलीले नकआउटका आधारमा प्रतिस्पर्धा गरेका आयोजक न्युटनका प्रिन्सिपल समेत रहेका नेपाल विद्यालय भलिबल कमिसनका अध्यक्ष राम केसीले जानकारी गराए ।