काठमाडौं (हाम्रो खेलकुद) – काल्सबर्ग गल्फ सिरिज अन्तर्गत पहिलो प्रतियोगिता टासी दोङले जितेका छन् । गोकर्ण गल्फ क्लबमा शनिबार स्टेबल फोर्ड थ्री बाइ फोर ह्यान्डीक्याप फर्माय्टमा भएको प्रतिस्पर्धामा ४४ अंकको सानदार नतिजामा टासीले उपाधि जिते ।

उपाधि जित्ने क्रममा दुई ह्यान्डीक्यापका टासीले एक बोगी र सात बर्डीका साथ सफलता प्राप्त गरेका थिए । दावा जे शेर्पा दोस्रो भए । उनले ३६ अंक बनाए । ग्रसतर्फ टासी छिरिङ सफल रहे । उनले उत्कृष्ट प्रदर्शन गर्दै एक इगल र छ बर्डी प्रहार गरेका थिए । यस स्पर्धामा माधव सिम्खडा दोस्रो भए।

महिलातर्फ आरति राणा पहिलो भइन् । उनीसँगै देवश्री राणाले समान २९ अंक बनाए‌पनि काउन्ट ब्याकमा आरति पहिलो भइन् । यसैगरी सिनियरमा ३६ अंक सहित तेज राई पहिलो हुँदा दिलिप रायमाझी दोस्रो भए । प्रतियोगितामा क्लोजेष्ट टु द पिनको उपाधि केसी गुरुङ, लङगेस्ट ड्राइभको उपाधि नीरभ कोइराला र मोस्ट बर्डिजको उपाधि टासि छिरिङले जिते ।

विजयी खेलाडीहरुलाई शनिबारै पुरस्कार वितरण गरिएको छ । सन् २०२० को काल्सबर्ग गल्फ सिरिजको यो पहिलो प्रतियोगिता हो । काल्सबर्ग सिरिज अन्तर्गत एक सिजनमा कुल तीन प्रतियोगिता हुनेछ । समग्रमा सबैभन्दा बढी अंक प्राप्त गर्ने खेलाडीले मुख्य उपाधि जित्नेछन् ।