काठमाडौं (हाम्रो खेलकुद) – पूर्व नम्बर १ शिवराम श्रेष्ठले सूर्य नेपाल गल्फ टुर २०१९-२० अन्तर्गत तेस्रो प्रतियोगिता सूर्य नेपाल वेस्टर्न ओपनको पहिलो दिन अग्रता लिएका छन् ।

पोखरास्थित हिमालयन गल्फ कोर्षमा शिवरामले १ अन्डर ६८ स्कोर जोड्दै पहिलो दिन अग्रता लिएका हुन् । उनलाई १ स्ट्रोक पछाडी रहेका धनबहादुर थापाले पछ्याएका छन् । शिवरामले फ्रन्ट नाइनमा १ अन्डर ३३ तथा ब्याक नाइनमा इभन पार ३५ स्कोर बनाए । धनबहादुरले फ्रन्ट नाइन र ब्याक नाइन दुवैमा इभन पार स्कोर लेखाए ।

संयुक्त तेस्रो  स्थानमा १ ओभर ७० स्कोरसहित धरानका तीन गल्फर शुक्रबहादुर राई, बलभद्र राई (मणि) र निरज तामाङ रहेका छन् । अघिल्लो महिना इस्टर्न ओपन जितेका बलभद्र लगातार दोस्रो उपाधिको खोजीमा छन् । इस्टर्न ओपनमा एमेच्योर उपाधि जितेका निरजले भने यस प्रतियोगितामा व्यावसायिक गल्फरका रुपमा डेब्यु गरेका छन् । उनले दक्षिण एसियाली खेलकुद (साग) मा सहभागिता जनाउँदा प्रो छनोट खेल्न नपाएपछि एनपीजीएले उनकै अनुरोधमा प्रो कार्ड प्रदान गरेको हो ।

भुवन कुमार रोक्का र भुवन नगरकोटी २ ओभर ७१ स्कोरसहित संयुक्त छैटौं स्थानमा छन् । रवी खड्का र जयराम श्रेष्ठ ३ ओभर ७२ स्कोरसहित संयुक्त आठौं स्थानमा रहेका छन् । दशौं स्थानमा रहेका रवी खड्काले ४ ओभर ७३ स्कोर बनाएका छन् ।

एमेच्योरतर्फ जितेन्द्र राई ५ ओभर ७४ स्कोरसहित पहिलो छन् भने उनलाई १ स्ट्रोक पछाडी रहेका सुरेश लामाले पछ्याएका छन् । कुल ४८ गल्फरको सहभागिता रहेको प्रतियोगितामा ३२ व्यावसायिक र १६ एमेच्योर गल्फर छन् । कुल ७ लाख पुरस्कार राशी रहेको प्रतियोगिताको विजेताले १ लाख २५ हजार प्राप्त गर्नेछन् । दोस्रो स्थान हासिल गर्नेले ७५ हजार र तेस्रो स्थानका खेलाडीले ५५ हजारमा चित्त बुझाउनेछन् । दुई दिनको खेलपछि शीर्ष २४ व्यावसायिक र ६ एमेच्योर खेलाडीले कट पार गर्नेछन् ।