फाइनलमा प्रतिभा घाइते

काठमाडौं (हाम्रो खेलकुद) – नेपाली राष्ट्रिय महिला भलिबल टोली तथा होंगान्जी न्यु डायमण्ड क्लबकी स्पाइकर प्रतिभा माली घाइते हुन पुगेकी छिन् । पाँचौ आरबीबी-एनभीए राष्ट्रिय भलिबल क्लब च्याम्पियनसिपको फाइनलमा एपीएफविरुद्ध खेल्दा उनले चोट बोकेकी हुन् ।

खेलको तेस्रो सेटमा स्कोर २२-२० को स्थितिमा रहँदा स्पाइक प्रहार गरेपछि ल्यान्डिङ नमिल्दा उनको घुँडामा चोट लागेको हो । मैदानमा लड्नेबितिक्कै निकै पिडामा रहेपछि उनलाई हस्पिटल लागिएको थियो । सुरुवाती एक्सरे रिपोर्ट अनुसार उनको घुंडाको हड्डीमा कुनै समस्या देखिएको छैन ।

भित्र रगत जमेको हुँदा उनको लिगाम्नेट वा मेनिस्कसमा समस्या रहेको हुनसक्ने आँकलन गरिएको छ । रगत जमेका कारण एमआरआई गर्न १-२ दिन कुर्नुपर्ने अवस्था रहेको अस्पताल स्रोतले जानकारी दिएको छ । चोटको गाम्भीर्यता हेर्दा उनले केहि महिना विश्राम गर्नुपर्ने देखिएको छ ।

नेपाललाई अन्तर्राष्ट्रिय भलिबलमा पहिलो पटक स्वर्ण पदक जिताउन महत्त्वपूर्ण भूमिका खेलेकी प्रतिभा महिला भलिबलकी उत्कृष्ट खेलाडी हुन् । उनी एभीसी सेन्ट्रल जोनमा उत्कृष्ट स्पाइकर समेत बनेकी थिइन् ।