धरान (हाम्रो खेलकुद) – सूर्य नेपाल गल्फ टुर २०१९/२० अन्तर्गत प्रदेश १ को एकमात्र प्रतियोगिता सूर्य नेपाल इस्टर्न ओपनर मंगलबार सुरु हुँदैछ । सुनसरीको धरानस्थित निर्भाना कन्ट्री क्लब हेल्थ एण्ड गल्फ रिसोर्टमा हुने प्रतियोगिता जारि सिजनको दोस्रो प्रतियोगिता हो ।

प्रतियोगिताको कुल पुरस्कार राशी ७ लाख रुपैयाँ रहेको छ । प्रतियोगितामा स्थानीय ७ सहित कुल ३४ व्यावसायिक गल्फरहरुले प्रतिस्पर्धा गर्नेछन् । तीन दिन चल्ने प्रतियोगिता ५४ होलको हुनेछ । प्रतियोगितामा सहभागिता जनाउन र कोर्षसँग अभ्यस्त हुन केहि दिन अघिदेखि नै घोपाक्याम्पमा रहेको कोर्षमा गल्फरहरु पुगिसकेका छन् । सल्लाको रुखले घेरिएको कोर्ष प्रतियोगिताका लागि विशेष परिमार्जन गरिएको छ ।

सूर्य नेपाल प्रालिको प्रायोजन तथा नेपाल व्यावसायिक गल्फर संघको आयोजनामा हुने प्रतियोगिताको विजेताले १ लाख २५ हजार प्राप्त गर्नेछन् । उपविजेताले ७५ हजार तथा तेस्रो स्थान हासिल गर्नेले ५५ हजार रुपैयाँ पाउने छन् । शीर्ष २४ व्यावसायिक गल्फरले नगद पुरस्कार प्राप्त गर्नेछन् । शुक्रबार हुने प्रो-एम इभेन्टमा व्यावसायिक खेलाडीले एमेच्योर खेलाडीसँग टोली गठन गरेर प्रतिस्पर्धा गर्नेछन् ।

साविक विजेता तथा यसै सिजन एमेच्योरबाट व्यावसायिक गल्फ सुरु गरेका स्थानीय गल्फर शुक्रबहादुर राई प्रतियोगिताको उपाधि दावेदार हुन् । उनलाई नम्बर १ उमेश नगरकोटी, एक महिनाअघि सेन्ट्रल ओपन जितेका  शिवराम श्रेष्ठ लगायतले चुनौती पेश गर्नेछन् । प्रतियोगितामा १६ एमेच्योर खेलाडीले प्रतिस्पर्धा गर्नेछन् । स्थानीय खेलाडी रितेश तामाङ र निरज तामाङलाई उपाधि दावेदारको रुपमा हेरिएको छ ।

सुरुवाती दुई दिनको स्कोरपछि शीर्ष २४ व्यावसायिक खेलाडीले अन्तिम दिन प्रतिस्पर्धा गर्नेछन् । यसबाहेक शीर्ष ६ एमेच्योर र व्यावसायिक खेलाडीको कट स्कोर पार गर्नेले अन्तिम दिन खेल्नेछन् ।