काठमाडौं (हाम्रो खेलकुद) – हेल्प नेपाल स्पोर्ट्स क्लब पाँचौ आरबीबी-एनभीए महिला तथा पुरुष राष्ट्रिय भलिबल क्लब च्याम्पियन्सिपको समूह डि को विजेता बनेको छ ।

आइतबार दशरथ रंगशालाको कभर्ड हलमा हेल्प नेपालले समूहको अर्को टोली बुद्ध टोललाई ३-० ले‌ पराजित गरेको हो । हेल्प नेपालले २५-१०, २५-१५, २५-११ को सहज जित दर्ता गर्यो । समूहमा दुई मात्र टोली रहेकाले दुवै टोली क्वाटरफाइनलमा प्रवेश गरेको हो ।

त्यसअघि मणिमुकुन्द भलिबल क्लबले पनि क्वाटरफाइनलमा स्थान पक्का गर्यो । अघिल्लो दिन पुलिसलाई वाकअोभर दिएको पार्वती भलिबल क्लब आइतबार पनि उपस्थित नहुँदा मणिमुकुन्द विजयी भयो ‌। अब समूह विजेता छिनोफानो गर्न पुलिस र मणिमुकुन्द भिड्ने छन् ।

त्यस्तै महिलातर्फ एपीएफले भरतपुर नगर खेलकुद परिषदमाथि सहज जित दर्ता गरेको छ । लगातार दोस्रो जित दर्ता गर्ने क्रममा एपीएफ २५-११, २५-१२, २५-१० ले विजयी भयो । आजै अन्तिम खेलमा आर्मी र जावलाखेल खेल्दैछन् ।

च्याम्पियनसिपमा पुरुषतर्फ ११ र महिलातर्फ ७ टोलीको सहभागिता रहेको छ । पुरुषतर्फको समूह एमा साविक विजेता आर्मी , आरजी र नयाँ बजार सामाजिक क्लब छन् । एपिएफ, बुलबुले र जावलाखेल भलिबल प्रशिक्ष केन्द्र समूह ‘बी’ तथा नेपाल पुलिस क्लब , मणिमुकुन्द भलिबल क्लब र पार्वती भलिबल क्लब समूह ‘सी’ मा छन् । समूह डीमा हेल्प नेपाल र बुद्धटोल रहेका छन् ।

राउन्ड रोविन लिगपछि समूहका शीर्ष दुई टोली क्वार्टरफाइनलमा पुग्नेछन् । महिलातर्फ दुई विभागिय टोली साविक विजेता नेपाल एपिएफ क्लब, आर्मी, जावलाखेल र भरतपुर महानगर समूह ‘ए’ तथा न्यु डायमण्ड स्पोर्टस क्लब, पुलिस र ढोरपाटन स्पोर्टस्स क्लब अर्को समूहमा छन् । राउन्ड रोविनपछि समूहका शीर्ष दुई टोली सेमिफाइनल पुग्नेछन् ।

प्रतियोगिताका दुवैतर्फका विजेताले २ लाख, दोस्रो हुने टोलीले १ लाख र तेस्रो टोलीले ५० हजार रुपैयाँ प्राप्त गर्नेछ । त्यस्तै दुवैतर्फका सर्वोत्कृष्ट खेलाडीले समान २५ हजार पाउनेछन् । विधागत उत्कृष्टले समान १० हजार रुपैयाँ पाउनेछन् ।