काठमाडौं (हाम्रो खेलकुद) – राजधानीमा जारी होंगान्जी न्यू डायमण्ड कप महिला भलिबल प्रतियोगिता २०७६ अन्तर्गत शनिबार सेमिफाइनल चरणका खेल सम्पन्न हुँदैछ ।

नयाँ बसपार्कस्थित ढोरपाटन स्पोर्ट्स क्लबको कोर्टमा चलिरहेको प्रतियोगितामा तीन विभागीय टोलीसहित आयोजक न्यू डायमण्ड स्पोर्ट्स क्लबले अन्तिम चारमा स्थान पक्का गरेको छ । लिग चरणको खेलमा समूह ए बाट नेपाल एपीएफ क्लब अपराजित रहँदै अन्तिम चारमा प्रवेश गर्यो । शुक्रबार अन्तिम लिग खेलमा आर्मीलाई हराउँदै एपीएफले समूह विजेताको रुपमा सेमिफाइनलमा स्थान बनाएको हो ।

यता आर्मीले सुरुवाती दुई खेलमा टप्स उच्च मावि र प्यारामाउन्टलाई पराजित गरेको थियो । एपीएफविरुद्ध भने सोझो सेटमा पराजित भएको आर्मी समूह उपविजेता बन्दै सेमिफाइनलमा पुगेको हो । एपीएफले त्यसअघि प्यारामाउन्ट र पहिल दिन टप्सलाई हराएको थियो । टप्सले सान्त्वना जित हासिल गर्ने क्रममा बिहीबार नै प्यारामाउन्टमाथि ३-१ को जित दर्ता गरेको थियो ।

अर्को समूहबाट होंगान्जी न्यू डायमण्ड लगातार दोस्रो जित दर्ता गर्दै समूह विजेता बन्यो । शुक्रबारको पहिलो खेलमा नेपाल पुलिस क्लबलाई ३-२ ले पराजित गर्दै आयोजक टोली समूह विजेता बनेको हो । पुलिसले त्यसअघि नै ढोरपाटन स्पोर्ट्स क्लबलाई हराउँदै अन्तिम चारमा स्थान पक्का गरेको थियो । न्यू डायमण्डले पनि बिहिबार नै ढोरपाटनलाई हराएको थियो ।

शनिबार हुने पहिलो सेमिफाइनलमा नेपाल एपीएफ क्लब र नेपाल पुलिस क्लब दिउँसो १:३० बजे खेल्नेछन् । त्यसपछि हुने दोस्रो सेमिफाइनलमा होंगान्जी न्यू डायमण्ड र त्रिभुवन आर्मी क्लबले प्रतिस्पर्धा गर्नेछन् । प्रतियोगिताको सम्पूर्ण खेलहरु हाम्रोखेलकुद डट कमले प्रत्यक्ष प्रसारण गरिरहेको छ ।