काठमाडौं (हाम्रो खेलकुद)– खराब मौसमका कारण होङ्गान्जी न्यु डायमन्ड खुला महिला भलिबल प्रतियोगिताअन्तर्गत आयोजक न्यू डायमन्ड क्लब र नेपाल पुलिस क्लबबीचको खेल रद्द भएको छ । बालाजु बसपार्क नजिकको कोर्टमा जारी प्रतियोगिताको तेस्रो खेलको चौथो सेट चल्दा वर्षा भएपछि खेल रद्द भएको थियो ।

समूह बीको त्यो खेलमा न्यू डायमण्डले २–१ को अग्रता बनाएको थियो । त्यस्तै जारी चौथो सेटमा भने पुलिस २०–१५ ले अगाडि थियो । सुरुवाती दुई सेट जितेको न्यु डायमण्डले त्यसपछि भने लय गुमाएको थियो । पहिलो दुई सेट न्यु डायमण्डले २५–२२, २५–१७ ले आफ्नो पक्षमा पार्यो भने तेस्रो सेट १८–२५ ले गुमाएको थियो । राष्ट्रिय महिला भलिबल टोली की कप्तान अरुणा शाही न्यु डायमन्डबाट खेलिरहेकी छिन् ।
त्यसअघि दुई खेलमा साविक विजेता नेपाल एपिएफ क्लब र त्रिभुवन आर्मी क्लब विजयी भएका थिए ।

एकपक्षिय खेलमा आर्मीले पारामाउन्ड इङ्लिस बोर्डिङ स्कुललाई २५–६,२५–१८,२५–९ ले हराएको थियो । त्यसअघि समूह एकै अर्को खेलमा साविक विजेता नेपाल एपिएफ क्लबले पोखराको टप्स माविलाई २५–११,२५–१० र २५–६ ले हराएको थियो । समूह ‘बी’मा अर्को टोली ढोरपाटन स्पोर्टस् क्लब रहेको छ ।

लिग कम नकआउटका आधारमा हुने खेलपछि समूहका शीर्ष २ टोली सेमिफाइनल पुग्नेछन् । प्रतियोगितामा कुल १३ खेल हुने आयोजकले जनाएको छ । मुख्य प्रायोजक होङ्गान्जी बौद्ध समाज नेपाल रहेको प्रतियोगिताको विजेताले ४ लाख १ हजार १ रुपैयाँ , दोस्रो हुने टोलीले ३ लाख १ हजार १ सय रुपैयाँ प्राप्त गर्नेछ ।

तेस्रो हुनेले टोलीले १ लाख ५१ हजार १ सय १ रुपैया तथा चौथो हुनेले ५१ हजार १ सय १ रुपैयाँ प्राप्न गर्नेछ । प्रतियोगिताको सर्वोत्कृष्ट खेलाडीले २१ हजार १ सय १ रुपैया प्राप्त गर्नेछन् । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७ हजार १ सय १ रुपैयाँ पाउनेछन् ।