काठमाडौं (हाम्रो खेलकुद) – साविक विजेता तथा १३औं सागको दोहोरो स्वर्णधारी सुवास तामाङले छैटौं संस्करणको जुनियर फाल्डो सिरिज गल्फको उपाधि जितेका छन् ।

गोकर्ण गल्फ क्लबमा शुक्रबार अन्तिम दिन २ अण्डर ७० स्कोरसहित सुवासले कुल ११ अण्डर २०५ स्कोर जोड्दै उपाधि जितेका हुन् । उनी समग्रमा समेत च्याम्पियन बन्न सफल भए । भारतका अभिराज सिंह चौहानले १४ ओभर २३० स्कोर गरे ।

१२ देखि १६ वर्षको उमेर समूहमा १३ वर्षीय सद्भाव आचार्यले उत्कृष्ट गल्फिङ स्किल पस्कदै च्याम्पियन बन्न सफल भए । उनले शुक्रबार ४ अन्डर ६८ स्कोरसहित समग्रमा ५ ओभर २२१ स्कोर गरे । उनले रितेश तामाङलाई ५ स्ट्रोक ओभरले पछि पारे । रितेशले १० ओभर २२६ स्कोर गरे । गर्ल्समा काश्मिरा शाहले २४८ स्कोर गर्दै च्याम्पियन बनिन् । प्रतिभा राईले २७२ स्कोर गरिन् ।

च्याम्पियन त्रय सुवास, सद्भाव र काश्मिराले ११औं फाल्डो सिरिज अन्तरगत भियतनाममा आयोजना हुने एसिया ग्रान्ड फाइनल चरणमा स्थान बनाउन सफल भएका छन् । विजयी खेलाडीलाई नेपाल गल्फ संघका अध्यक्ष टासी घलेलगायतले पुरस्कृत गरे । बुधबारदेखि सुरु भएको तीन दिने फाल्डो सिरिजमा १२ देखि २१ वर्ष उमेर समुहका १६ जुनियर खेलाडीले प्रतिस्पर्धा गरेका थिए । महिलामा ४ खेलाडीले प्रतिस्पर्धा गरेको थियो ।