काठमाडौं (हाम्रो खेलकुद) – यसै साता सम्पन्न १३ औं दक्षिण एसियाली खेलकुद (साग) का पदक विजेता खेलाडीको नगर परिक्रमा केहि समय अघि सुरु भएको छ । राष्ट्रिय खेलकुद परिषद् (राखेप) बिहान ११ बजे सुरु भनिएपनि चिसो मौसमका कारण ढिला गरि मात्र र्याली सुरु भएको छ ।

राखेपले सागका पदाधारी खेलाडीलाई उपत्यकाका तीनै जिल्ला काठमाडौं, ललितपुर भक्तपुरका विभिन्न स्थानमा परिक्रममा गराउने बताएको छ । त्रिपुरेश्वरस्थित राखेपको परिसरबाट सुरु हुने नगरपरिक्रमा कार्यक्रम न्युरोड, ईन्द्रचोक, मखन, भोटाहिटी, रत्नपार्क, भृकुटीमण्डप, भद्रकाली, सिंहदरबार, थापाथली, पुल्चोक, जावलाखेल, लगनखेल, सातदोबाटो, कोटेश्वर, जडिबुटी, नयाँ थिमी, सल्लाघारी, सुर्यविनायक चोकमा पुग्नेछ ।

सुर्यविनायक चोटबाट टोली पुन सल्लाहघारी, नयाँ थिमी, जडिबुटी, कोटेश्वर, तीनकुने, नयाँ बानेश्वर, थापाथली हुँदै राखेप प्राङ्गणमा आएर टुंगिने बताइएको छ । सरकारले यसअघि सागका पदक विजेता खेलाडीलाई नगदसहित सम्मानको घोषणा गरेको थियो । सागमा एकल विधामा स्वर्ण विजेतालाई ९ लाख, रजतलाई ६ लाख र कास्यलाई ४ लाख घोषणा गरिसकेको छ । यस्तै एक भन्दा बढी स्वर्ण विजेता खेलाडीलाई ११ लाख घोषणा गरिएको थियो ।

टिम ईभेन्ट्समा स्वर्ण जित्ने खेलाडीलाई जनही ५ लाख दिने सरकारले घोषणा गरेको छ । टिम इभेन्टसका रजत र कास्यधारीको पुरस्कार घोषणा भने भएको छैन । स्वर्ण जिताउने प्रशिक्षकलाई ५ लाख रुपैया घोषणा गरिएको छ । यद्दपि सरकारले घोषणा गरेको पुरस्कार राशिमा सरकार र राखेपकै मतभेद छ । सागको इतिहासमा नेपालले यस पटक सबैभन्दा बढी स्वर्ण पदक जितेको छ । ५१ स्वर्ण पदक जितेको नेपालले ६० रजत र ९५ कास्य गरि २ सय ६ पदक जितेको थियो ।