काठमाडौं (हाम्रो खेलकुद) – नेपाल र भुटानको यू २३ टोलीबीच मंगलबार फुटबल फाइनल पछि १३ औं दक्षिण एसियाली खेलकुद (साग) को औपचारिक रुपमा समापन समारोह हुने भएको छ । समापन समारोह अहिले सम्मकै व्यवस्थित बनाउने तयारी भइरहेको राष्ट्रिय खेलकुद परिषद् (राखेप) का सदस्य सचिव रमेशकुमार सिलवालले सोमबार पत्रकार सम्मेलनमार्फत दाबी गरेका छन् ।

सागका लागि स्थापित मिडिया सेन्टरमा आयोजित पत्रकार सम्मेलनमा बोल्दै सदस्य सचिव सिलवालले साग सुरु देखि अहिलेसम्म व्यवस्थित रुपमा सञ्चालन भइरहेको उल्लेख गर्दै समापनलाई झनै व्यवस्थित र भव्य बनाउने बताए । साग फुटबलको साविक विजेता नेपाल र पहिलो पटक फाइनल पुगेको भुटानबीच स्वर्ण पदकका लागि मंगलबार दिउँसो ३ बजे दशरथ रंगशालामा प्रतिस्पर्धा सुरु हुनेछ ।

त्यसअघि दिउँसो १२ बजे सांसद ११ र राष्ट्रसेवक कर्मचारी ११ बिच मैत्रीपूर्ण फुटबल हुने तय गरिएको जनाइएको छ । नेपाल र भुटानबीचको प्रतिस्पर्धापछि समापन समारोह सुरु हुने र त्यो डेढ घण्टा चल्ने सदस्य सचिव सिलावले बताए । त्यस्तै समारोहलाई प्रधानमन्त्री केपी शर्मा ओलीले भिडियो प्रबिधिमार्फत सम्बोधन गर्ने तयारी भएको बताइएको छ ।

उद्घाटनमा जस्तै समापनका त्यसका मुख्य अतिथि उपप्रधानमन्त्री ईश्वर पोखरेल, युवा तथा खेलकुदमन्त्री , जगतबहादुर सुनार (विश्वकर्मा), नेपाल ओलम्पिक कमिटी (एनओसी) का अध्यक्ष जीवनराम श्रेष्ठ, सदस्यसचिव सिलवालले सम्बोधन गर्ने बताइएको छ । समापन समारोहमा १४ औं सागको आयोजक राष्ट्र पाकिस्तानलाई झण्डा हस्तान्तरण गरिनेछ । त्यसैगरी नेपाल भ्रमण बर्ष २०२० लाई प्रबद्र्धन गर्ने गरी बिशेष कार्यक्रम प्रस्तुत गरिने पनि सदस्य सचिव सिलवाल बताए ।

सो अवसरमा साग ऐतिहासिक रुपमा सफलतापुर्वक सम्पन्न भएको सन्देश दिनेगरी मार्च पास, सांस्कृतिक कार्यक्रम र आतिसबाजी हुनेछ । समापनका लागि कार्यक्रम स्थलका प्यारापिटलाई विभिन्न श्रेणीमा बर्गिकरण गरिने भनिएको छ । भिभिआइपी, भिआईपी, पत्रकार, पदक विजेता खेलाडी, विदेशी, कर्मचारीलगायतलाई भिन्दाभिन्दै क्षेत्र राखिने व्यवस्था गरिएको जनाइएको छ ।

फुटबल फाइनलका लागि प्रतिटिकट भिआइपीतर्फ २ हजार र साधारण प्यारापिटतर्फ १ हजार रुपैयाँ तोकिएको छ । १२ हजार अट्ने साधारणतर्फका लागि ८ हजार टिकट मात्र विक्री गरिएको बताइएको छ ।

प्रधानमन्त्रीले प्रोत्साहन प्याकेज घोषणा गर्ने !

प्रधानमन्त्री केपी शर्मा ओलीले बुधबार राष्ट्रका नाममा सम्बोधनका साथै सागका विजेता खेलाडीका लागि प्रोत्साहन प्याकेज घोषणा गर्ने तयारी भइरहेको राखेप सदस्य सचिव सिलावलले पत्रकार सम्मेलनमा जानकारी दिएका छन् । साग अघि पनि खेलाडीको मनोबल बढाउनका लागि कार्यक्रम आयोजना गरिएपनि प्रधानमन्त्री ओलीको स्वास्थ्य खराब भएका कारण प्याकेज घोषणा भएन ।

प्रधानमन्त्रीकातर्फबाट खेलाडीलाई सम्बोधन गर्दै अर्थमन्त्री युवराज खतिवडाले पुरस्कार राशीमा उल्लेख बृद्धि हुने उल्लेख गरेपनि प्रष्ट कति बढ्ने बताएका थिएनन् । १२ औं सागका व्यक्तिगत इभेन्ट्का स्वर्ण पदक विजेताले ५ लाख, रजत पदक विजेताले ३ लाख र कास्य पदक विजेताले २ लाख रुपैयाँ प्राप्त गरेका थिए । यसपटक पुरस्कार राशीमा विगतको भन्दा दोब्बर हुने विश्वास गरिएको छ ।