पोखरा(हाम्रो खेलकुद)- नेपाली महिला राष्ट्रिय बिच भलिबल टोलीले दक्षिण एशियाली खेलकुद (साग) मा पहिलोपटक समावेश गरिएको बिच भलिबलमा कास्यपदक जितेको छ । फेवाताल किनारस्थित बाराहीघाटमा भएको अन्तिम दिनको खेलमा नेपालकी विनिता बुढाथोकी र नेविका चौधरीको जोडीले नेपालकै कोपिला उप्रेती र मनिषा चौधरीको जोडीलाई २१–१२, १९–२१ र १६–१४ को सेटमा पराजित गरी कास्य जितेको हो ।

पुरुषतर्फ नेपालका दुवै टोली लिग चरणबाट बाहिरिएका थिए । महिलाका दुवै टोली समूह उपविजेता हुँदै सेमिफाइनलमा प्रवेश गरेका थिए । महिला तथा पुरुष दुई विधामा दुई स्वर्ण, दुई रजत र दुई कास्यको लागि प्रतिस्पर्धा भएको थियो ।

बिच भलिबलको महिला तथा पुरुष दुवैतर्फ श्रीलंकाले स्वर्ण र रजतपदक जित्न सफल भयो । पुरुषतर्फ श्रीलंकाका प्रदीप आसंगा र असेन कुमाराको जोडीले भारतका टिरोन र जायन सनुजाको जोडीलाई २४–२२ र २१–१३ को सोझो सेटमा हराउँदै स्वर्णपदक जित्न सफल भयो । महिलातर्फ श्रीलंकाकै दीपिका जेडेरा र मधुशानी वीरासिंगेको जोडीले लक्षिनी थारुका र दिनेशा प्रसादनीको जोडीलाई १९–२१, २१–१५ र १५–८ को सेटमा हराएर स्वर्ण जिते ।

पुरुषतर्फ पाकिस्तानका मोहम्मद रज्जाक र वसीन मोहम्मदको जोडीले पाकिस्तानकै जस्नव खान र अफाख खानको जोडीलाई २१–१५ र २१–१४ को सेटमा हराएर पाकिस्तानले कास्य पदक जित्न सफल भयो ।